USA ka 22 anyos nga babaye nipasangil sa usa ka tripolante ug tulo ka mga apprentice sa barko nga magbiyahian sa Samar nga nagtinabangay paglugos kaniya sulod sa cabin samtang naglawig ang sakyanan paingon dinhi sa Sugbo.

Ang biktima nireklamo sa Maritime Police sa dihang nidunggo ang barko sa pantalan sa dakbayan sa Sugbo sa miaging adlaw.

Ang biktima nga dalaga taga lungsod sa San Fernando, Sugbo.

Base sa report sa Maritime Police, ang mga suspek giila nga sila si Aldrin Albarando, 22, taga Brgy. Langod, Argao, Sugbo; Alvin Nalda, 28, taga San Miguel, Leyte ug Layman Regañon, 24, taga Patawag, Liloy, Zamboanga del Norte, pulos mga apprentice sa M/V Calbayog sa FJP Shipping Lines.

Sa Pier 2 na sila sa dakbayan sa Sugbo nadakpan.

Laing nadakpan human sa hot pursuit operation giilang mao si 2nd officer Timoteo Sampayan, 32, taga San Isidro, Northern Samar.

Giingong samtang naglawig ang barko, naila-ila sa biktima si Sampayan, minyo.

Human sila magkasuod gidala sa gikatahapan ang biktima sa iyang lawak diin didto na nagpaabot ang tulo ka mga suspek.

Nireklamo ang biktima nga sud sa kuwarto gitabangan siya paglugos sa mga suspek.

Wa siyay nahimo sud sa kuwarto, nakuha gyud ang iyang pagkababaye.

Ang biktima daling mipahibawo sa iyang gidangatan ngadto sa Maritime Police hinungdan nga nahitabo ang hot pursuit operation.

Ang upat ka mga suspek gi-turnover ngadto sa Waterfront Police Station sa may Pier 1.

Ang biktima ubos na sa pag-custody sa Women’s desk ug gikatakda kining ipahiling sa mga mananambal aron matino kon nakuha ba gyod ang pagkababaye niini.

Samtang ang mga gikatahapan nagdumili sa pagluwat og pamahayag ngadto sa mga tigbalita.

Apan kagahapon aduna nay mga abogado nga miduaw sa mga gikatahapan.

Kasong rape giandam na batok sa mga suspek.

Samtang ang tag-iya FJP Shipping Lines nisulti kagahapon nga ang tulo ka mga apprentice ug ang usa ka tripolante taktakon sa kompaniya guilty man sila o di sa giingong paglugos sa babayeng pasahero.

Si FJP president ug general manager Florentino Palacio niingon nga ang upat taktakon tungod sa ilang panag-inom samtang naglawig ang barko kay supak kini sa polisiya sa kompaniya.

“Let the public know that we are not tolerating any violation or crime committed by our crew against our passengers. We are conducting a separate investigation on this matter,” nagkanayon si Palacio.

Samtang si Director Nanette Villamor Denopol sa Maritime Industry Authority (Marina) 7 nimando na og imbestigasyon sa gikatahong rape.

“We will act on it immediately,” nagkanayon si Denopol. dugang taho sa Sun.Star Cebu