Shabu tiangge gironda na sab

DUHA ka mga babae ang nangasikop sa mga sakop sa Philippine Drug Enforcement Agency (PDEA-10) atol sa ilang gihimong buy-bust operation sa iladong shabu tiangge sa siyudad niadtong nilabayng adlaw mga alas 6:00 sa buntag sa Sto. Ni¤o, Brgy, 31 ning siyudad sa Cagayan de Oro.

Arestado sila si Hannah L. Tanggo, 22, minyo, sa susamang dapit ug Arlene M. Villanueva, 31, giingong usa ka bugaw, apil usab sa target list sa drug personalites, taga Cruz Taal St., ning siyudad.

Malampuson nga nasikop ang duha sa operasyon nga gipangulohan ni PDEA-Northern Mindanao Director Edwin F. Layese kinsa nibahad nga sa dili madugay mapuhag ug wala nay drug pusher sa dapit.

Ang duha konsabo dihang namaligya og gituohang shabu sa usa ka PDEA undercover agent, samtang nakasibat ang bana niining si Kossain Smith alyas Orak atol sa operasyon.

Narekober usab ang ubay-ubay nga mga drug paraphernalia, ug gitouhang shabu nga adunay gibug-aton nga 2.7 gramo ug mokantidad sa P18,900.

Ang mga suspetsado kasamtangan detinadao sa buhatan sa PDEA ug gikatakdang pasakaan og kaso.

Gani atol sa operasyon usa gihapon ka lalaki ang misibat ug niambak sa parel sa Limketkai Drive hinungdan nabalian og tiil.

Dihang gitabangan sa usa ka taxi driver ug dalahon unta sa ospital, nimando kini nga dili magpadala sa balay tambalanan hinungdan sa pagduda sa driver ug dalahon usa kini sa usa ka sibyaan sa radyo aron magpatambag kung asa dalahon.

Wala man niini masayri nga apil kini nga dakpunon sa PDEA nga nihimo sa operasyon niadtong tungora.

Nakurat na lamang ang driver dihang giparking ug pagbalik sa iyang taxi wala na ang maong lalaki ug gikabutyag nga gihunongan sa kauban niining sakay sa motorsiklo.

Gituohang ang maong lalaki mao ang bana ni Villanueva nga si Orak nga nakasibat human sa insidente.

Si Layese niingon nga alerto na ang mga balay tambalanan sa siyudad ingon man sa mga kasikbit nga dapit kung ugaling magpatambal ang biktima. (Stephanie V. Berganio)