TULO ka mga lalaki ang pulos nilanding sa balay tambalanan human giluba sa managlahing dapit ning siyudad sa Cagayan de Oro.

Unang hitabo natigayon kagahapon mga alas 12:30 sa kadlawon, sa Lapaza-Uno, Lapasan ning siyudad sa Cagayan de Oro.

Giila ang mga biktima nga mao sila si Genry Mahinay, 18, ulitawo, sa susamang dapit ug naapil sa insidente nga mao si Robert Alta, 22, ulitawo, sa susamang dapit.

Si Mahinay nangdisko sa dapit niadtong tungora kauban ang pipila ka mga barkada apan kalit lang nagkagubot ug naglubaay ug si Mahinay nahimong sentro sa pagpangluba.

Nadunggaban ang biktima sa iyang dighan nga bahin ug wala na makasukol.

Nasayran nga niadtong nilabayng adlaw adunay gikaaway ang biktima sa maong dapit hinungdan nga gidumtan ug giluba.

Si Alta niadtong tungora nga igo lang nanan-aw sa dapit ug nangdisco apil nga nalubaan tungod sa kagubot, samaran ang bukton niini.

Silang duha gidala sa mga polis gikan sa Police Station 3 (PS3) sa Agora sa Northern Mindanao Medical Center (NMMC) samtang ang suspek gibalhog sa prisuhan ning panahona.

Sa laing bahin usa gihapon ka lalaki ang nilanding sa susamang tambalanan human giluba kagahapon mga alas 2:00 sa kadlawon sa Divisoria ning siyudad.

Giila ang biktima nga mao si Renz Junanan, 23, ulitawo, taga Xavier Height ning siyudad.

Nasayran nga gikan nag night cafe ang biktima ug dihang mouli na sa puloy-anan ug nag-atang og masakyan kalit lang giduolan sa duha ka wala mailang lalaki ug deretsong giluba gamit ang ice pick.

Duha ka samad sa dughan ang naangkon sa biktima nga gidala gihapon sa mga polis gikan sa Police Station 1 (PS1) sa Divisoria.

Gituohang paregla ang motibo sa suspek labina daw dili hubog ang biktima niadtong tungora. (Stephanie V. Berganio)