Mga duwa karon:

4:00 pm-

Rose Aquarius-USPF vs. GaisanoCapital-UC

5:30 pm- Winner Beef Loaf-CIT vs. Lion Tiger-UV

7:00 pm- San Marino-SWU vs. Prime Asia-USC

PUNTERYAHON sa league-leaders Gaisano Capital-UC Webmasters ug Lion Tiger Aerosol-UV Green Lancers ang ikatulo nilang sunodsunod nga kadaugan sa ilang pagpakigbatok og lainlaing kontra karong hapon sa Cebu Schools Athletic Foundation Inc. (CESAFI) 2011 Partner’s Cup sa Cebu Coliseum.

Ang Webmasters makigharong sa Rose Aquarius-USPF Panthers sa premirong duwa nga sugdan sa alas 4:00 sa hapon samtang ang Green Lancers makigsangka sa Winner Beef Loaf-CIT Wildcats sa ikaduhang kombati.

Sa main game, mag-engkuwentro ang San Marino Corned Tuna-SWU Cobras batok Prime Asia Pawnshop-USC Warriors.

Ang Green Lancers, nga gikan sa dominasyon batok sa Warriors, 75-49, inilog gyud kaayo sa ilang pagpakigharong sa Wildcats.

Apan dili gyud angayan nilang kompiyansaan ang Wildcats kay taas sab ang moral niini nga mosulod sa korte kay gikan sila sa makapakaging nga kadaugan batok sa Ave Maria Sanctuary Park-USJR Jaguars, 81-74.

Sa ilang bahin, inilog sab gyud kaayo ang Webmasters batok sa Panthers.

Apan gumikan sa barangayan system nga gihangop sa liga alang sa elimination round, dili sab gyud makaseguro ang Webmasters.

Kabahin sa sangka sa Cobras ug Warriors, makonsiderar nga balanse ra ang kompetisyon.