WA NA gidugay pa sa Negros Occidental pride nga si Donnie "Ahas" Nietes ang away kontra Mexican fighter Armando Vasquez, human niya kini gituldokan sa unang round pa lang nga gihimo didto sa La Salle Coliseum sa siyudad Bacolod.

Ang maong away gitituluhan nga "Battle of the Champions"- Pinoy Pride 5 nga may ubay-ubay sab ka undercards.

Kini ang unang away ni Nietes isip tune-up game sa junior flyweight division sa iyang pag-saka sa timbang nga 108 pounds gikan sa 105 pounds.

Tungod sa bag-ong kadaugan abli si Nietes sa mas bug-at nga weight division.

Tipik niini, gihuotan na ni Nietes ang bag-ong ring record nga 28-(16 KO)-1-3; samtang si Vasquez sab may 18-(KO 4)-6-0.

Nagpasalamat sab si Nietes ngadto sa mga Pilipino nga mi-ampo, mihatag og suporta alang sa iyang kadaugan.

Samtang, nindot sab ang away sa undercard fight nga sila Jason Pagara sa Upper Carmen, Cagayan de Oro City kontra kang Deo Njiko sa Africa; Roli Gasca sa Barile, Cebu batok kang Ngaotawan Sitsaithong sa Thailand ug Lorenzo Villanueva sa North Cotabato kontra James Mokoginta sa Indonesia.

Ang "Battle of the Champions"-Pinoy Pride 5 dungan sa highlights sa Panaad Festival, nga nailhang "Mother of all Festival" sa Negros Occidental.