DILI ikalimod, dako na og kalahian ang dagan sa panahon karon mugna sa kausaban sa klima sa kalibotan nga resulta sa global warming.
Naandan niadto nga panahon sa kuwarisma maglagiting ang kainit sa adlaw busa nindot itampisaw sa dagat o tubig aron magpabugnaw sa bakasyon sa summer.
Semana Santa na karon apan naglagom ang kalangitan sa bagang panganod tungod sa low pressure area (LPA) nga nisulod sa nasod hinungdan sa tumang kalandong ug pag-uwan.
Gani, nipasidaan ang Pagasa weather bureau nga mangandam sa posible nga pagbunok sa uwan tungod sa LPA nga hinungdan unya sa pagdahili sa yuta ug baha.
Klaro nga lahi na gyod ang panahon.
Kini ang angay natong hatagan og mas lawom ug igong pagpamalandong ning pag-obserbar sa Semana Santa nga malambigit sa pasyon ug kamatayon ni Hesu Kristo sa pagluwat sa iyang mga nilalang nga naglakip sa kinaiyahan.
Sumala sa mga sayantipiko, ang mga dagkong isla sa ice sa north ug south poles nahinay og katunaw hinungdan sa pagsaka sa tubig tungod sa global warming.
Unsay hinungdan sa global warming? Dili ba epekto kini sa polyusyon nga nagguba sa natural nga salaan sa kainit sa adlaw nga ozone layer sa kawangan? Kinsay nagmugna sa polyusyon? Dili ba tawo lang usab?
Mga giya kini nga pangutana aron masabtan ang kasamtangang dagan sa panahon ug makahimo kita sa tukma nga aksyon, human dili kini pagbuot sa Kahitas-an apan, ginama lang mismo sa katawhan nga una nang giluwas sa Manunubos gikan sa kasal-anan. Mag-ampo ug magpakabana kita.