GIBUHIAN na sa mga kidnaper ang negusiyanteng si Jinkee Yap kinsa gidagit didto sa siyudad sa Cotabato.

Sa nahagpat nga taho gikan sa Cotabato City Police Office (CCPO), nasayran nga alas 2:30 sa kadlawon kagahapon nasiplatan ang biktima nga naglakaw sa utlanan sa Kabuntalan, Maguindanao ug sa siyudad sa Cotabato.

Si 7th Marine Battalion Landing Team 7 commander Colonel Jose Dorotheo Jalandoni nagbutyag nga giabandona sa mga kidnaper si Yap gumikan kay naipit ang mga kidnaper sa gipalig-on nga operasyon sa kasundalohan.

Nakita sab sa dagway sa biktima ang 'trauma' gikan sa kamot sa mga suspetsado hinungdan nga dali siya nga gipailawom sa 'stress debriefing'.

Kahinumduman, kinse milyunes pesos ang gipangayo sa mga sakop sa Pentagon Kidnap for Ransom Gang nga gipangulohan ni Kumander Toks Saguile apan gikatahong miubos sa kantidad nga tunga sa milyon ka pesos.

Human gibuhian ang biktima, mikatag karon ang balita nga mibayad og ransom ang pamilya sa biktima bugti sa kagawasan ni Yap.

Ang biktima maoy ikaduha nga gidagit sa siyudad sa Cotabato City sa tuig 2011.

Una mao Ading Yu nga hangtud karon nagpabilin pa sa mga kamot sa mga midagit kaniya. (Edgardo Fuerzas)