GIHINGUSGAN karon sa Digos City Police Office (DCPO) ang pagpatuman sa Operation Kap-kap sa mga bay kalingawan sa dakbayan.
Gimando ni Superintendent Huberto Abadia, city police director, ngadto sa iyang mga ginsakpan ang paghimo sa maong operasyon matag gabii.
Target sa kapulisan ang tanang imnanan ug uban pang establisemento sa maong operasyon.
Gitin-aw ni Abadia na ang maong operasyon gihimo aron nga hugtan ang pagbantay sa siyudad ilabi na gyud niadtong mga tawo nga naghupot og mga armas o mahait nga hinagiban.
Gawas sa ilang paglusad sa Operation Kap-kap, nagmuntar sab sila og checkpoint sa dalang Rizal Avenue aron susihon ang mga moaging motorista.
Gihugtan sab sa DCPO ang pagbantay sa palibot sa ilang estasyon human na-monitor ang hulgang pagpanulong sa mga rebeldeng New People's Army (NPA).
Sa pikas bahin, usa ka mag-uuma ang gisikop sa kapulisan human gimando sa Municipal Circuit Trial Court (MCTC) sa Sulop-Malalag, Davao del Sur.
Si Police Officer 2 Rodel Paras, warrant officer sa Malalag Police Station, nag-ila sa ilang dinakpan nga mao si Mariano Basmayor Sr. minyo ug nagpuyo sa Barangay Kaputian sa lugar.
Sumala ni Paras, ang 44 anyos nga suspek nasikpaw banda alas 10:15 sa buntag niadtong Sabado subay sa warrant of arrest nga gipaguwa ni Judge Ray C. Andres tungod sa kasong direct assault nga nakadoket sa criminal case number 5517.
Gidala ang suspek didto sa buhatan sa kapulisan ug gipriso. Hinuon, ang suspek mahimong makaangkon og kagawasan kon mobayad og piyansa nga kantidad og P12 mil. (Dondon Dinoy)