HIKABSAN sa kinabuhi ang usa ka sakop sa New People's Army (NPA) ug laing duha ang nasamdan sa pinusilay nga nahitabo alas 9:00 sa gabii niadtong Dominggo didto sa probinsiya sa Cotabato.
Nasayran gikan sa Public Information Office sa 6th Infantry Division sa Philippine Army, nga samtang nagpatrolya ang mga sakop sa 2nd squad sa 2nd Platoon sa Charlie Company sa 57th Infantry Battalion kinsa gipangulohan ni Staff Sargeant Ulysses Lumapas sa Barangay Mahongkog, Magpet, ilang na-engkwentro ang gibana-banaan nga 20 ka rebeldeng NPA nga milungtad og lima ka minuto.
Mga rebelde daling miatras paingon sa tiilan sa Mount Apo ug wala na maapsi sa mga sundalo.
Sumala sa mga molupyo sa maong dapit, nga ilang nakita ang usa ka sakop sa NPA nga namatay ug laing duha samaron kinsa gipas-an sa ilang kauban atol sa ilang pagsibat sa nahitaboan.
Gibutyag ni 602nd Brigade Commander Colonel Cesar Sedillo nga grupo ni Kumander Punyong sa Front Committee 53 ang na-engkwentro sa mga sundalo.
Ang munisipyo sa Magpet, Makilala, President Roxas, Antipas, Arakan ug Tulunan maoy giingong mga lugar sa Cotabato nga gilubluban sa mga NPA.
Gitahasan na ni 6th ID chief Major General Anthony Alcantara ang 57th IB nga palig-unon ang ilang operasyon batok sa mga NPA sa ikaduhang distrito sa North Cotabato. (Edgardo Fuerzas)