DUHA ka miyembro sa pamilyang Ampatuan ang naangol sa nahitabong engkwentro tali sa mga sakop sa Moro Islamic Liberation Front alas 2:00 sa hapon niadtong Dominggo didto sa probinsiya sa Maguindanao.

Nailhan sa kapulisan ang mga biktima nga sila Sukarno Utto Ampatuan, 55, minyo ug iyang anak nga si Rohola, 24, mga molupyo sa Barangay Sampao, Rajah Buayan.

Gibutyag ni Colonel Prudencio Asto, hepe sa Public Affairs Office sa 6th Infantry Division sa Philippine Army nga mga mag-amahang biktima nga sila si Sukarno ug Rohola tua sa ilang uma sa dihang na-engkwentro ang grupo ni Teng Lumenda alyas Kumander Flash sa 106th Base Command sa MILF nga pulos mga armado.

Nahitabo ang pinusilay nga milungtad og 30 minutos tali sa mga biktima ug sa grupo sa MILF.

Apan tungod kay gipildi sa gidaghanon, mga biktima nasamdan atol sa insidente ug gidala sa Sultan Kudarat Provincial Hospital ug naa na karon sa luwas nga kahimtang.

Nagkaguliyang sab ang mga molupyo sa maong dapit gumikan kay nabalakang maigo sa mga saag nga bala.

Nahunong lang ang pinusilay sa diha nga nagpatunga sila Rajah Buayan Mayor Jacob Ampatuan ug Vice-Mayor Jonathan Lumenda ug napakalma ang kagubot.

Gituohan nga bangi sa giugmad nga yuta maoy hinungdan sa maong insidente. (Edgardo Fuerzas)