GRABE ang kahimtang sa usa ka lalaki kinsa napusilan sa pulis nga miresponde sa dapit diin nanghasi ang suspek niadtong Dominggo.

Midangat sa Southern Philippines Medical Center (SPMC) mao si Samson Villarin, 37, nagpuyo sa Purok 8, Barangay Bago Gallera, siyudad sa Davao.

Base sa rekord sa SPMC, si Villarin nakaangkon og samad pinusilan sa iyang likod, usa sa kilid, duha sa paa ug usa sa tiil mao nga gitambalan siya sa mga doktor.

Sa spot report sa Talomo Police Station, nasayran nga si Villarin nanghasi didto sa ilang dapit mao nga gireklamo ni Liza Soliño, nagpuyo sa Purok 4, Suhain Village, Barangay Bago Gallera.

Giingon nga nagkalalis sila Villarin ug Soliño tungod kay gusting papahawaon ni Villarin ang pamilya Soliño sa ilang balay mao nga nangayo sila og police assistance.

Si Villarin gikatahong mipauli sa ilang balay ug sa iyang pagbalik, nagdala na og atsa hinungdan nga nangayo sila og police assistance.

Dihang miresponde ang mga sakop sa Mobile 51 sa Talomo Police Station, ilang naaktuhan nga nanghasi si Villarin sa maong lugar mao nga gipahimangnoan siya nga mokalma ni PO2 Rommel Guaza.

Giingon nga imbes mopatuo si Villarin, iya na hinuon nga giatubang ang mga pulis mao nga napugos ang si Guaza pagpusil sa tiil ni Villarin.

Bisan samaran na siya, suma sa report, misamot hinuon ang iyang kasuko ngadto kang Guaza pinaagi sa pag-atsa sa pulis mao nga nausban si Villarin.

"Giatake man sa suspect si PO2 Rommel Guaza mao nga napugos ang atong pulis nga i-neutralize ang suspect," ni Police Chief Inspector Joselito Loriza, hepe sa Talomo Police Station kagahapon dihang gitawgan sa Superbalita.

Si Loriza nagkanayon nga ila nang giandam ang mga affidavit sa mga nakasaksi sa maong hitabo aron ipasaka ang kaso batok kang Villarin.

"So far, we are preparing the affidavits of the witnesses. Ang kaso ang among ipasaka sa iyaha mao ang assault to person in authority," pahayag ni Loriza.

Sa pagsuwat ning balita, ang suspek padayong gitambalan sa mga doktor sa SPMC samtang gihuwat ang adlaw nga siya taralon sa salaod nga iyang nahimo. (Alger Dura)