PATAY nang midangat sa tambalanan ang usa ka estudyanteng babaye human siya giluba sa lalaki nga giingon nga nahigugma kaniya sa hilum alas 2:30 sa kaadlawon kagahapon didto sa dalang Ponce, Barangay 28-C Poblacion, siyudad sa Davao.

Ang biktima mao si Michelle Aaron Lubaton, 20, dalaga, estudyante sa Ateneo de Davao University ug lumad nga taga-Surala, South Cotabato.

Si Lubaton gideklarang dead on arrival sa mga doktor sa Southern Philippines Medical Center (SPMC) human siya giluba ni Jhunel (bangsagon gitago kay menor de edad), 16, nagpuyo sa Barangay Tibungco, ning siyudad.

Si Gaspar Avila, tag-iya sa GMGK Apartment diin nagpuyo ang biktima, nagbutyag sa Superbalita nga nasayran niya ang insidente dihang nakadungog siya og kasaba sa lawak nga giabangan sa biktima.

"Nakadungog ko nga naay kasamok sa sulod dayon nadungog nako ang singgit sa biktima," ni Avila kinsa midugang nga ang suspek maoy nagbantay kaniya nga nag-antos sa stroke.

Human sa hitabo, suma ni Avila, daling miikyas ang suspek gikan sa ikaduhang andana sa apartment pinaagi sa pag-ambak sa taas nga gate.

Si Jhunel giingon nga nakaangkon og samad sanglit nasangit siya sa talinis nga puthaw nga iyang giagian sa pag-ikyas.

"Sa akong nahibaloan sa among pag-istoryahanay sa suspek, naa siyay pagnanasa sa victim kay gwapa man god si Michelle. Si Jhunel gyud ang suspect kay naa may nakakita sa iya nga migawas sa kwarto," ni Rommel nga ig-agaw ni Jhunel.

Si Rommel nagsulti sa Superbalita nga makaduha na nga nabilanggo ang suspek tungod sa kasong pagpangawat didto sa ilang lugar sa Tibungco.

"Napriso naman daw na siya. Mianhi lang na siya diri sa amoa kay mitabang pagbantay sa among uncle Gaspar," ni Rommel.

Si Police Senior Inspector Ronald Lao, hepe sa Sta. Ana Police Station, nagbutyag sa Superbalita kagahapon sa hapon nga padayon pa nilang gipangita ang suspek nga si Jhunel.

Sa pagsuwat ning balita, wa pa masuta sa kapulisan kung unsa ang tinuod nga motibo sa suspek mao nga ilang gipaabot ang report sa mga doktor nga mo-otopsiya sa biktima.

"Ipa-autopsy pa namo kay naka-panty naman god ang victim pagkuha namo sa crime scene," pahayag ni Lao. (Alger Dura)