USA ka taxi driver ang nagpatabang sa Police Station 2 (PS2) sa Cogon human giingong gikarnap sa Kano ang iyang gimanehong taxi niadtong Sabado.
Si Police Officer 2 Mercy Ambungan sa PS2 sa Cogon niila sa taxi driver nga mao si Alex Salcedo, taga Tignapoloan ning siyudad ug driver sa Diamond Taxi nagdala sa plaka KVV-693, adunay body number nga 6685.
Gisaysay ni Ambungan atol sa pakighinabi sa Sun.Star Superbalita nga nahitabo ang pagpangarnap mga alas 10:00 sa buntag niadtong Sabado sa Bangcod, siyudad sa Malaybalay, Bukidnon dihang gipakyaw sa kano si Salcedo.
Daan na nga suki ni Salcedo ang kano tungod kay nag check-in man kini sa usa ka hotel ning siyudad niadtong adlawng Huwebes.
Gani nahimong suod kini sa driver ug giuban pa ang iyang pamilya sa pag-shopping sa mall hinungdan nga dako ang pagsalig ni Salcedo niini.
Niadtong Sabado niingon ang Amerkano nga pakyawon niya ang taxi niini paingon sa Valencia sa kantidad nga P3,500.00 hinungdan nga misugot usab si Salcedo sa pangyawat nga makakwarta.
Nabantayan ni Salcedo nga adunay van nga misunod kanila nga kadudahan og lihok hinungdan nga nananghid si Salcedo nga magpa-blotter sila sa duol nga police station apan dili mosugot ang kano tungod kay gibutyag niini dili masaligan ang mga polis.
Tungod sa kahadlok ni Salcedo, iyang gihunong ang taxi ug nagpasumangil nga na-flat ang ligid apan nihunong usab ang van nga misunod kanila ug nakigsulti sa Kano nga daw murag mga kaila.
Ang van adunay giguyod nga taxi usab apan walay plaka.
Nangutana si Salcedo sa mga tawo sa dapit aron unta magpatabang dihang kalit lang nga gisakyan sa Kano ang frontseat ug gidala ang taxi ug misunod dayon ang van niini.
Nakurat pag-ayo si Salcedo dihang gibiyaan siya apan tungod sa grabeng kahadlok mipara ang biktima ug bus ug nisakay paingon ning siyudad ug nagpatabang sa mga polis.
Dihang gisusi sa kapolisan ang hotel nasutang Roldan Ron ang pangalan nga narehistro sa maong kano.
Sa kasamtangan, alerto na ang tibuok probinsya sa Bukidnon aron maatangan ang maong taxi samtang ang kaso gikatakdang ipasaka karon adlawa. (Stephanie V. Berganio)