UPAT ka mga tawo ning-claim sa usa ka Chinese gold bracelet nga na-recover sa Theft and Robbery Section (TRS) gikan sa usa ka ginang sa Barangay Pasil, dakbayan sa Sugbo, nga niprenda niini niadtong miaging semana.

Una niini, si Lorelie Pongkol niprenda sa alahas sa kantidad nga P50,000 sa ahensya sa alahasan sa Pasil dihang dunay usa ka pulis nga nakakita niini hinungdan nga gipasusi sa TRS.

Si Chief Insp. Bonifacio Garciano, hepe sa TRS sa Cebu City Police Office (CCPO) nagkanayon nga kagahapon sa buntag si Pongkol nidu-aw sa iyang buhatan aron kuhaon ang alahas.

Apan iya kining gibalibaran ug gipasabot nga di pa niya mahimong ihatag karong panahona hangtud ang laing mga ning-claim niini makapakitag mga dukomento o bisan picture sa tinud-anay nga tag-iya nga gisul-ob ang alahas.