GIKOMPIRMAR ni Gob. Gwen Garcia nga si Sr. Supt. Patrocenio Comendador maoy iyang gipili isip permanenteng director sa Cebu Provincial Police Office gikan sa lista nga gisumitir sa Police Regional Office-7.

Ang gobernador nitug-an sa mga tigbalita kagahapon nga nakaduso na kini og tubag sa suwat ni Chief Supt. Ager Ontog, director sa PRO-7 nga nagpahibawo nga si Comendador maoy iyang gipili.

Kini atol sa turnover sa upat ka mga tseke sa Kapitolyo ngadto sa witness protection program nga gitambungan nila ni Ontog, Comendador ug ubang mga opisyal sa PRO-7 sa miaging semana.

Si Comendador, uban nila ni Sr. Supt. Mariano Natuel, pangu sa Regional Police Community Relations sa PRO-7 ug Sr. Supt. Edward Carranza, pangu sa Regional Comptrollership Division sa PRO-7 maoy gipili-an sa gobernador pagka director sa CPPO.