GI-GANG RAPE sa upat ka mga tripolante sa MV Calbayog sa Palacio Shipping Lines ang ilang pasahero.
Nisamot ang kalagot sa biktima kay giingong dihang iyang gireklamo ang hitabo ngadto sa kapitan sa barko ug sa Coast Guard personnel, gikataw-an lang siya niini kuyog sa mga suspek nga nangatawa usab dihang gipangtudlo niya nga nagtinabangay pag-rape kaniya.
Niini, kasong pagpanglugos ang gipasaka batok nilang 2nd Mate Timoteo Sampayan, 32, minyo, molupyo sa San Isidro, Northern Samar; Aldrin Albarando, 22, ulitawo, usa ka apprentice engineer, nagpuyo sa Barangay Langug, Argao; Layman Degañon, 24, ulitawo, usa ka apprentice electrician ug molupyo sa Liloy, Zamboanga del Norte ug Alvin Nalda, 27, residente sa San Miguel, Leyte sa Cebu Prosecutor’s Office kagahapon.
Silang Sampayan ug kaubanan ningpirmag waiver of detention hinungdan nga gihatagan silag 10 ka adlaw ni Cebu City Assistant Prosecutor Maria Theresa Casiño aron mosang-at sa ilang counter-affidavit sa kasong ilang giatubang.
Nisaysay si Maria (tinuod nga ngalan gipugngan) nga dihang anaa siya sa kabin ni Sampayan nga nailhan niyang Atan gitabangan sa mga suspek og hubo ang iyang gisul-ob nga senina.
“Tan, maluoy tawon ka,” sangpit niya kang Sampayan samtang siya naghilak aron di siya hilabtan niini.
Apan, wa siya panumbalinga sa suspek hinuon nipadayon gyod kini sa paghilabot kaniya.
Si Sampayan maoy niuna sa pagtuslok sa iyang kinatawo unya giyak-an ang iyang dughan ni Nalda dayon gipugos siya sa pagpaum-om sa kinatawo.
Human sa duha, nipuli silang Degañon ug Albarando sa pagpatong kaniya unya nisunod na usab si Sampayan apan wa makahuman human nakaya niyag tukmod tungod sa kadaut sa lawas niini.
Nanglakaw ang tulo human sa insidente samtang si Sampayan na lang ang nahabilin unya gihangyo siya niini nga di nalang mohilak
Nadugangan ang iyang kasagmuyo kay ang sud sa iyang pitaka nagpasad unya ang P700 nga sud niini nalakip og kahanaw.
“Grabeha ninyo sa, wa pa man mo matagbaw sa inyong gibuhat nako gikawatan pa gyod ko ninyo,” nagkanayon siya kang Sampayan unya gitubag siya niini nga “basin og hubog raka” apan giingnan niya kini nga wa siya mahubog.
Si Maria nisakay sa MV Calbayog niadtong Abril 7 sa gabii gikan siyang nakigkita sa iyang uyab nga tripolante usab usa ka barko aron mopauli sa Sugbo.
Nakig-ila-ila si Sampayan kaniya kinsa may kaila usab nga tripolante nga kauban sa iyang uyab busa nakigtubay siyag tabi hangtod nga giimbitar siyag inom sa ilimnong makahubog.
Kay di man pwede nga mag-inom sa iyang giestahan sa barko, gidala siya ni Sampayan ngadto sa kabin ug didto nag-inom silag beer.
Samtang tagayan siya, may higayon nga mosud siya sa pansayan aron ibugwak ang iyang giinom busa wa kaayo siya mahubog.
Dihang niyamar na siyang matulog, didto na siya gitabangan sa paglugos.
Nakagaws siya sa kabin unya giam-aman siya ni Sampayan ug giulian siya sa P700 nga nawala niyang kwarta.
Gihangyo pa siya nga ihilom na lang ang nahitabo kay nagmahay na silang tanan sa ilang gibuhat kaniya.
Dihang niabot siya sa Sugbo sa pagka-sunod adlaw nangutana siyag tawo kon asa ang buhatan sa Coast Guard kay buot niyang ireklamo ang nahitabo kaniya.
Gikuyogan siya sa taga Coast Guard aron itudlo ang mga suspek apan gikataw-an lang siya niini ug sa kapitan sa barko, ug giingong niapil pag katawa ang taga Coast Guard .
Pwerti niyang hiubosa, busa nihukom siya nga mopauli nalang apan ang tawo nga maoy una niyang napangutan-an niaghat nga kuyogan siya sa pagreklamo sa Department of Social Welfare and Development (DSWD) busa giingnan siyang moreklamo una sa kapolisan unya nidangop siya sa Vicente Sotto Memorial Medical Center aron ipahiling ang nahitabo kaniya.
Napalgang positibo siyang nahilabtan samtang ang mga suspek nadakpan sa Maritime police.