NIDAKO pagmaayo ang isyu kabahin sa pagpasayaw sa usa ka sais anyos nga lalake og malaw-ay diha sa “Willing Willie” nga TV show ni Willie Revillame. Di lang mga ordinaryong mga mananan-aw ang nireklamo ug ang mga government censor. Niapil na sab sa pagreklamo ang mga world class artists nga Pinoy sama nila ni Monique Wilson.
Sakto bitaw ang panahom ni Monique nga gusto kita nga mailhan ang mga Pinoy nga world-class artists apan dunay mga Pinoy sama kang Willie nga mopasundayag og ingon niini.
Unya suportado pa gyud sa usa ka television network.
Sa akong tan-aw, simple ra man kining kang Willie. Gusto siya og atensyon alang sa iyang show nga naa na karon sa usa ka bag-ong television station.
Ubay-ubay sa iyang mga kanhi mananan-aw dihang diha pa siya sa laing television station wa na mosunod kaniya kay tua man say laing show nga giilis sa iyang popular nga noontime show nga Wowowee.
Sa timeslot sab ni Willie, daghan siya og kompetensya.
Ug tungod sa maong insidente nga giangalan sa uban, nahimong front page news ug gani headline material ang kontrobersya kabahin sa show ni Willie.
Positibo man o negatibo ang maong publisidad, nakahibawo na ang mas daghang tawo karon nga naa na diay si Willie sa maong estasyon.
Hinuon, ambot kon nalantawan ba ni Willie nga ang ingon niini nga kontrobersya makatandog sab sa iyang mga advertiser ug mga kadagkuan sa television network.
Apan kon ilang makita nga mokalit pagsaka ang rating sa sa “Willing Willie,” sigurado gyud ko nga modugang pa ang ilang pagsuporta kang Willie Revillame.
Nakaingon ko niini kay bag-o man ang maong estasyon kon kinahanglan gyud kini og atensyon ug mabutang nga sentro sa mga kontrobersya.
Manghinaot lang ko nga ilang timbangan ang television show ni Willie ug mga tarong sab nga mga pasundayag.
Ang ako lang gyud nga mabantayan sab sa ordinaryong mga Pinoy kay ang ingon niini man gud nga show ang ilang ampay. Hatagi og world class presentation kay langawon.
Kining mga world class angayan lang sa mga audience nga adunahan. Kining mga kabus, malingaw magsud-ong sa mga tawo nga pareho nila nga naninguhang makadaog og gagmayng mga premyo. Antuson na lang gud ang pagpakaulaw aron lang makakwarta.
Sa laing bahin, samtang naila ang mga Pinoy sa gawas sa nasud tungod sa atong mga world class artists sama nilang Monique ug Lea Salonga o kini si Charice, grabi sab kaayo ang atong imahen tungod sa mga law-ay nga mga pasundayag sa Internet ug kining mga bikini bar dinhi sa atua.
Duna lang koy pangutana niining atong mga awtoridad nga nangronda karon, nganong kana ra mang Jaguar ang giinitan? Ang uban diay? Napalta sila sa patong? Nagkinahanglan na og performance? O oplan pakilala pa ni? Pangutana lang ni Sir.