GITUNOL na sa kadagkoan sa hydropower plant sa Aboitiz Power Company ang bahin sa probinsiyal nga kagamhanan sa Davao del Sur human sa usa ka tuig nga katukuran niini didto Barangay Sibulan, lungsod sa Sta. Cruz, Davao del Sur.
Niadtong Lunes, gidawat ni Davao del Sur Governor Douglas Cagas ang tseke nga kantidad og P1.6 milyones atol sa convocation program nga gihimo didto sa Davao del Sur Sports and Business Center Complex.
Usa ka tuig na ang 42.5 Sibulan Hydro Power Plant niadtong Marso 26 ug nakatunol na sab og P1.1 milyon nga bahin sa munisipyo sa Sta. Cruz, tunga sa milyon sa Barangay Darong ug P1 milyon sab alang sa Tribal Community sa nahisgutang lugar.
Sa kinatibuk-an, nakaani og P5.8 milyon ang Davao del Sur gikan sa maong kompaniya, wa pay labot ang usa ka sentimo matag kilowatt hour nga diskuwento sa kuryenteng magamit sa giserbisyohang komunidad.
Nakabenepisyo ang Hedcor og 42.5 megawatts (MW) gikan sa Sibulan River sa lungsod sa Sta. Cruz diin adunay kinatikbu-ang generation nga 105.50 GWhs sa limpyong enerhiya ug renewable energy.
Gikanayon ni Rene Ronquillo, Hedcor president, nga padayong nagatabang ang ilang kompaniya sa katawhan sa maong dapit ilabi na may kabahin sa programang panlawas, edukasyon, pasuga, pag-ayo sa kalasangan ug panginabuhian. (Orlando B. Dinoy)