WA na makaantos ang 75 anyos nga tiguwang lalaki nga magdugay pa siya dinhi sa kalibutan mao nga nakahukom siya nga magpakamatay pinaagi sa paghikog niadtong Lunes.

Nagpakamatay mao si Francisco Lopez Sr., 75, minyo, nagpuyo sa Purok 4, Sitio Culosa, Barangay Lizada, distrito sa Toril, siyudad sa Davao.

Si Police Officer 3 Vevencio Vertudazo, duty investigator sa Toril Police Station, nagbutyag sa iyang spot report nga nakaplagan ang biktima sud sa iyang lawak alas 7:00 sa buntag pinaagi sa iyang pag-umangkon nga si Marites Ege, 42.

Matud ni Vertudazo nga nasiplatan ang biktima nga nagbitay gamit ang electrical wire nga gihigot sa iyang liog ug ang isig ka tumoy gihigot sa kisame.

Si Ege giingon nga nangayo dayon og police assistance aron tabangon ang iyang uyuan apan dimalas kay patay na dihang miabot ang mga otoridad.

Nakuha gikan sa nahitaboan sa krimen ang dose metros nga electrical wire nga maoy gigamit sa biktima sa iyang paghikog.

Gituohan sa kabanay sa biktima nga dunay gihambin nga suliran ang tiguwang nga siya lamang ang nasayud mao nga nagpakamatay siya.

Ang biktima atua karon gihaya sa Angel Funeral Homes samtang giandam ang iyang katapusang pahulayan. (Alger Dura)