KAMATAYON ang nadawat sa usa ka lalaki nga gituohan nga gun runner gikan sa mga pulis nga buot niyang patyon pinaagi sa pagpusil alas 8:45 sa gabii niadtong Lunes.

Ang insidente nahitabo sud sa giabangan nga bay sa suspek didto sa San Jose, Ipil Beach, Barangay Governor Vicente Duterte, distrito sa Agdao, siyudad sa Davao.

Namatay mao si Merjan Ng Suy, 20, minyo, nagpuyo sa Almasiga Street, Block 13, Lot 8, Awhag Subdivision, Barangay 19-B Poblacion, ning siyudad.

Si Suy nakabsan sa iyang kinabuhi human siya gipusil sa mga mirespondeng pulis nga gipangulohan ni Police Senior Inspector Ronald Lao, hepe sa Sta. Ana Police Station.

Mga pulis naglusad og hot pursuit operation aron sikupon ang suspek kinsa giingon nga maoy nagpusil kang Julio Daytic, 18.

Ang biktima gipusil sa suspek niadtong miaging adlaw didto sa South San Juan, Barangay Centro, distrito sa Agdao.

Sa paghiabot sa kapulisan sa dapit diin nagtago ang suspek, mikuha og duha ka .38 kalibre nga rebolber ang suspek dayon gipusil ang mga pulis mao nga napugos sila pagpusil kang Suy.

Si Suy naigo sa iyang dughan ug ulo nga miresulta sa iyang kamatayon.

Nakuha gikan sa iyang poder ang duha ka .38 kalibre nga rebolber nga dunay serial number 776996 ug 41717 ug mga buhing bala.

Ang kapulisan nagtuo nga gun running ang trabaho sa suspek base sa pahayag sa mga silingan sa namatay.

"Posible nga gun runner ang suspek kay daghan man siya mga baril tapos iyang cellular phone naay mga transaction messages," ni Police Senior Inspector Ronal Lao dihang nahinabi kagahapon pinaagi sa telepono sa Superbalita.

Ang maong opisyal nagtuo sab nga nalambigit sa gidiling druga ang suspek sanglit naay transaksiyon sa pagpayuhot og marijuana ang mensahe sa text nga ilang nakita sa cellular phone sa suspek.

"Naay transaction nga mopalit daw siya og duha ka kilong marijuana. Naay daghang pawn papers ang among nakuha sa iyaha. Dihang among gipangutana ang asawa, wala daw siya nakabalo sa trabaho sa iyang bana," pahayag ni Lao.

Ang patay nga lawas sa suspek atua karon gihaya sa Angel Funeral Homes. (Alger Dura)