DUHA ang patay sa managlahing mga sunog niadtong sa Huwebes, Abril 9, ug Biyernes Santo, Abril 10. Pulos kini nagsugod sa mga abuhan.
Unang natala ang usa ka senior citizen nga nakalas human malakip sa sunog sa sityo Banika, Barangay Lahug, dakbayan sa Sugbo, alas 11:46 sa gabii niadtong Huwebes.
Nasunog ang balay ni Rosita Ponce, 74, diin siya nalakip kay wa na makagawas.
Anaa sa P240,000 ang danyos sa sunog nga niugdaw sa pito ka mga balay.
Samtang, patay usab ang usa ka person with disability (PWD) sa sunog sa Barangay Pulo, lungsod sa Alcantara, niadtong Biyernes Santo.
Ang biktima mao si Blesila Macasaol, 49, kinsa usa ka amang ug dunay deperensiya sa pangisip ug tag-iya sa balay nga nasunog. Nadawat ang alarma sa Dumanjug Fire Station sa alas 4:05 sa hapon.
Matod ni Fire Inspector Rex Harrison Florido sa Dumanjug Fire Station nga nagsugod ang kayo sa abuhan.
Gibanabana nga anaa sa P10,000 ang danyos sa maong sunog. (HBL)