NAGPABILIN ang misteryo sa pagkawala sa usa ka American national kinsa na-missing ning dakbayan sa Cagayan de Oro sukad niadtong Enero 11, 2011, bisan gipamugos sa usa ka dakong opisyal nga gidagit gyud si Milton Strowel Taylor.

Usa ka tinubdan kinsa dili buot magpa-ila niingon sa Sun.Star Cagayan de Oro nga nagpadayon karon ang negosasyon tali sa mga kidnaper ug sa US Embassy alang sa dinalian nga pagbuhi sa biktima.

Sumala sa maong tinubdan nga gibutyag sa US Embassy nga dili nila ihatag ang demanda nga ransom money sa mga kidnaper "bisan pa kong kini bugti sa kinabuhi sa biktima."

Si Taylor, 64, taga Ohio, USA niabot ning dakbayan sa Cagayan de Oro niadtong Disyembre 2010 ug ni-check-in sa Lamar Inn sa dalan Velez-J.R Borja ning siyudad kinsa naka-rehistro sa ngalan nga "Sam Taylor" sa receiving desk.

Nasayran nga nalambigit si Taylor sa usa ka mining business.

Dihang nawala si Taylor niadtong bulan sa Enero, anaa ra sa hotel ang iyang personal nga mga gamit lakip na ang passport hinungdan nga nagtuo ang mga awtoridad nga wala kini gidagit.

Tungod niini, sila si Mayor Vicente Emano ug Police Superintendent Antonio Montalba, police deputy director, nisimang dihang nasayran nga pakyas si Taylor pagbayad sa iyang bills sa Lamar Inn human nahagsa ang iyang mining investment.

Nagtuo sila Emano ug Montalba nga nagtago-tago lang si Taylor samtang nangita og paagi pagsulbad sa iyang mga bayrunon.

"He's into buying gold bars and we don't know he encounters financial problem along the way that he's been running from someone else," matud ni Emano sa iyang regular Sunday program sa usa ka lokal nga radyo.

Mao usab kini ang panglantaw ni Senior Superintendent Benedicto Lopez sa wala pa siya gihulipan sa bag-ong director nga si Senior Superintendent Gerardo Rosales sa Cagayan de Oro Police Command (Cocpo).

Sumala sa tinubdan kinsa ni-qoute sa pamahayag sa US Embassy nga si Taylor dunay tulubagon sa balaod sa panahon nga siya makabuhi.

Giingong nakalapas si Taylor sa federal law tungod sa paggamit sa pangalan sa usa ka foundation sa US aron makakuha og financial assistance gikan sa iyang mga kauban.

"Naa siyay mga utang pero ang kuwarta gi-finance niya sa pagpalit og gold bars. And though dili siya wanted, naa siyay federal law violation," butyga sa agent sa Sun.Star Cagayan de Oro.

Nagpadayag ang maong agent nga dako ang posibilidad nga mabuhian ra si Taylor sa dili madugay. (Annabelle L. Ricalde/SSCDO)