"DILI diay gihapon tanan kabus gusto tabangan ubos sa pamunuan ni Presidente Benigno Aquino pinaagi sa Philippine Charity Sweepstakes Office (PCSO) dinhi sa probinsiya sa Misamis Oriental."
Mao na lang kini ang pagmahay sa usa ka amahan nga gibalibaran sa PCSO-Misamis Oriental kagahapon human kini maningkamot nga makakuha sa tanang rekisitos aron lang maangkon ang gamay nga hinabang unta ngadto sa anak niini nga adunay sakit nga allergic rhinitis.
Matud ni "Loweno", amahan sa 6 anyos nga bata, grabe ang tuyok-tuyok niini niadtong Lunes taliwala sa kainit sa adlaw ug gasto sa pamilite makakuha lamang ug case study gikan sa city social welfare and development (CSWD) pagsuporta nga pobre gayud kini ug angay nga tabangan.
Ang case study, matud sa usa ka social worker sa PCSO-MisOr ngadto kang Loweno, kinahanglan aron nga mapamatud-an nga angay tabangan ang pasyente niini nga halos mawad-an na ug pandungog tungod sa gibati nga sip-on ug ubo.
Ug tungod sa kawad-on hangtud karon wala kini makapalit og tambal alang sa iyang anak.
Ang papeles ni Loweno gitatakan og "not allowed per guidelines," diin kini gipirmahan sa internal auditor sa PCSO-MisOr.
Hinoon, giingong nakasabot si Loweno sa giingong dili angay tabangan ang iyang anak tungod kay matud pa sa PCSO-MisOr, dili pa grabe ang gibati sa pasyente.
"Hulatan ko na lang nga mo-grabe ang akong anak ayha ko mobalik sa PCSO kay ingon man nila nga dili pa man daw grabe ang gibati sa akong anak," niya pa.
Base sa medical abstract ni Dr. Robert Tagocon sa St. Ignatius Health Foundation, Inc., dinhi sa Cagayan de Oro, kinsa maoy doktor sa bata, pila na ka semana nga gibati sa bata ang posible pa nga mo-grabe nga sip-on ug ubo kon dili kini matambalan sa labing sayo nga panahon.
Ang medical abstract isa sa rekisitos basehan sa tabang sa PCSO-MisOr diin pila usab ka higayon nga gipangkamotan ni Loweno nga makuha alang sa gamay nga tabang unta sa PCSO-MisOr.
"Pero wala gihapoy pulos akong paningkamot. Sagdi na lang, basin sila ang manginahanglan sa ako puhon..." pagmahay ni Loweno ug midugang: "gamay ra man unta akong kinahanglan, lisod man diay ko matabangan. Maglisod man gani sila ug tabang sa akong bata, samot na niadtong dagko na ug kinahanglan." (LSM)