UNSA gud diay ni. Duna may nagpatugatuga og organize og fun run sa niaging weekend dinhi sa Sugbo nga wa makahatag sa ilang gisaad nga premyo.
Dako kining pakauwaw sa Sugbo nga makaapekto niadtong mga ubang running organizers.
Tiaw mo bay imbis ang premyo nga ilang gisaad P6,000, P4,000 ug P2,000 sa mga 10-k winners ug P4,000 sa 5-k champions ang tanang mga mananaog, kaluoy sa Diyos, gitagaan lang og tag P500. Kinsa guy, malipay ana.
Usa ka Rose Soltones, giingong head sa organizing committee sa 1st Cebu Fun Run nga gipaluyohan sa C 24/7 Food Supplement and Nautra Ceuticals sa Ayala Center, misaad nga ilang hutda’g hatag ang mga mananaog sa higayon nga mahurot na’g baligya ang mga nahabiling singlets.
Matod pa nga sa 2,000 ka mga singlets nga gitagana, 700 ra ang nangapil. Kakuyaw gud og rason. Sa ato pa, kon di mahalin, wa say premyo.
Mora man og yaga-yaga ni ngadto sa atong mga running enthusiasts nga makaapekto usab sa atong pipila ka tarong nga mga running organizers.
Kini maoy angay hatagan og pagtagad sa atong mga local officials. Aron di mosanay ning klaseha sa mga organizers, kinahanglan ipa-imbestigar kini.
Makapahibulong kay duna gud silay sponsor unya nganong di man kahatag og premyo.
Nindot ra ba unta og tumong kay para kono makapalit og mangrove seedlings alang sa tree-planting sa Olango Island ug paghatag og suporta sa mga namuyo sa Inayawan landfill.
Lisod og mao ni magdaghan. Mas maayo gani i-ban ning grupoha.
*******
Ang 1st round knockout nga kadaugan ni Donnie Nietes batok sa Mexicanong si Armando Vazquez niadtong Sabado didto sa Bacolod City wa maghatag og tubag sa pangutana kon andam na ba siya sa iyang pagsaka ngadto sa light flyweight division.
Kini tungod kay wa makita ang iyang abilidad sa maong away nga maoy una niyang fight sa light flyweight class.
Kon nataod-taoran pa unta to, didto unta nato madeterminar kon aduna bay kalahi-an sa iyang lihok kon itandi sa inawayan sa minimumweight division.
Mahibaw-an unta kon nakaapekto ba sa iyang kusog, kakilas ug kaigmat ang pagpasaka niya sa iyang gibug-aton.
Kon hisgutan ang eksperiyensiya, layo ra usab kaayo si Vazquez (18-6, 4 KOs) kon itandi ni Nietes (28-1, 16 KOs). Mas mubo usab kini og duha ka pulgadas.
Sa laktod nga pagkasulti, way nakuhang leksiyon si Nietes sa iyang 1st round knockout nga kadaugan batok ni Vazquez.
Apan bisan pa man niini, dako ug positibo gihapon ko nga malangkat ni Nietes ang iyang ikaduhang world division title kon kini mahinayon, karong Hulyo o Agusto.
Dako ang akong pagsalig sa lig-ong determinasyon ni Nietes. Dili sayon ang pagdepensa sa iyang WBO minimumweight title katulo ka higayon nga didto mismo sa Mexico, luna sa iyang challenger.
Goodluck, Donnie, keep up the good work. (email address: junmigs0622@yahoo.com)