GIKINAHANGLANG dalion sa gobiyerno pinaagi sa paggamit sa puwersa sa mga awtoridad aron sa pagluwas sa mga bata nga gigamit sa sindikato sa ilang illegal nga kalihukan sama sa operasyon sa cyber sex den ug sa negusyo sa illegal nga drugas.

Apan ang nakita nako nga problema diha lang sila kutob kay wamay mga dagko sa sendikato ang nadakpan. Kay sindikato man lagi naa say nagpaluyo nga mga anaa sa gobiyerno ilabi sa mga law enforcers.

Sama gud sa kalampusan sa kapulisan sa pagdakop sa 17 anyos ug unya usa na ka bigtime drug pusher diha sa notadong barangay sa Calamba, siyudad sa Sugbo. Asa naman ang nagpaluyo sa bata; waman lagi madakpi?

Ingon niini kalig-on ang sindikato. Mao nga mabalaka kita nga tungod sa kalig-on sa sindikato mas modako ang problema nga atong masugatan. Busa kitang mga ginikanan atong sundan ang kalihukan sa atong mga anak.

NAWA ANG EBIDENSYA

Igo lang gyud ta sa pagkomentaryo ug pangutana kay diman kita abogado aron hisgutan ang legal nga aspito may labot sa nakab-ot nga hukom sa huwes sa pag-uli sa mga ebidensya nga nakuha sa kapulisan batok sa mga bag-ong suspek sa kamatayon ni Ellah Joy Pique.

Nimando man gud si Regional Trial Court ( RTC ) Executive Judge Menrado Paredes sa Criminal Intelligence and Detection Group ( CIDG- 7) nga maoy nag-imbestigar sa kaso sa pag-uli sa mga ebidensya sama sa Pajero ngadto sa suspetsado.

Tungod niini makapangutana ta, unsa may mahitabo sa kasong giatubang sa usa ka British national nga si Ian Charles Griffiths ug uyab nga si Bella Ruby Santos nga huyang naman ang mga ebidensya?

Ako nalang ang motubag sa akong pangutana. Magpiyesta sa kalipay ang mga akusado kauban na sa ilang pamilya ug mga higala samtang magpas-an ug sinakong kuwarta ang mga abogado sa sinumbong.

Para nako basta kaso ang ebidensya mao gyud ang makapalig-on sa kaso. Bisan pa niini naglaom pa intawon gihapon si Senior Supt. Patrocinio Commendador, spokesman sa Ellah Joy Case, nga pinaagi sa ilang testigo nga maoy mitumbok sa mga suspek nga lig-on gihapon ang kaso.

Maayo unta! Kay ang usa ra gyud ka letter sa plate number sa Pajero ang sayop nga maoy gibasihan sa huwes nga di mao ang sakyanan. Kay ang orihinal nga plaka LMJ 382 ug unya LHJ 382 ang giingon sa mga nakakita nga maoy gisakyan sa paglabay sa patayng lawas sa bata.

Sa ako gani nga pagtan-aw ginamit ang dako nga grado sa eye glass ‘H’ nga may pagka ‘M’ ang letter. Mao nga maayo unta ug tagaan ug konsiderasyon ang motion nga giduso sa mga abogado sa CIDG kay sa pagsuwat nako ning lindog wapa nila iuli ang Pajero bisan pa sa mando sa huwes.

SAYOP SI SAAVEDRA

Daghan ang nagkatawa ug naglingolingo sa pasangil sa nagpatuong whistleblower nga si Cris Saavedra sa iyang pasangil ni Gob. Gwen Garcia maoy nakaingon nga nisamot ang sakit sa nag-leave nga Bise Gob. Greg Sanchez .

Sa akong nadawat nga email, giingon nga unsay pagtuo ni Saavedra ni Gwen barangan? Dungan sa pang-ingon ESTORYAHE… Kay matud pa daan na kunong may problema sa lawas ang vice governor ug ang stress nga gipasangil ni Saavedra di makadot sa away sa mga pulitiko. Tinuod ba?

Ug matud pa, ang gihimo ni Saavedra tungod ni sa iyang personal nga kasuko sa gobernador ug gigamit lang ang isyu sa problema sa panglawas sa besi gobernador. Kay basi sa pagtuon ang tawo ma-stress tungod sa problema sa pamilya, negusyo ug bisyo.

(efren_lonzon@yahoo.com; 09156938444 ug 09232883868)