GIHIMAKAK sa kapitan sa mv Calbayog ang pasangil sa biktima nga giingong gilugos sa upat ka mga tripulante sud sa barko, nga gikataw-an lang niya kini dihang nireklamo ngadto kaniya nga gitabangan kini og lugos sa upat niya ka mga sakop.
Matod ni Teofanes Ganzon, kapitan sa barko nga imposible ang maong pasangil sa biktima tungod kay nihimo man dayon siya og imbestigasyon human masayri nga dunay nahitabong pagpanglugos sud sa barko.
Si Ganzon sa pakighinabi sa Sun.Star Superbalita kagahapon nagkanayon nga naguol kaayo siya sa nahitabo tungod kay isip kapitan sa barko responsibilidad niya ang kaluwasan sa mga pasahero samtang anaa sud sa barko.
“Pwerteng guola nako sa hitabo kay akong responsibilidad ang safety sa mga pasahero”, padayag sa kapitan sa Sun.Star Superbalita.
Siya nagkanayon nga human mahibaw-i ang insidente iya dayong gipatawag ang upat ka mga suspek ug gisukit-sukit sa nahitabo nga gipanghimakak niini.
Iya usab gipatawag ang ubang mga tripulante sa mv Calbayog kon duna ba sila’y kasayuran sa giingong nahitabong rape sa biktima ug dayon report ngadto sa management sa FJP Shipping Lines.
Si Atty. Audie Arnado, tigpamaba sa FJP Shipping Lines nipahibawo nga nagpadayon karon ang ilang pakisusi sa maong hitabo.
Matod niya apil sa ilang giimbestigahan si Ganzon ug uban pang mga tripulante sa barko nga sakay niadtong higayona dihang giingong nahitabo ang pagpanglugos.
Samtang ang Coast Guard personnel nga giingong maoy unang giduol sa biktima ug gipangayo-an og tabang niini, girelibohan una sa puwesto.
Matod ni Commander Rolando Lizor Punzalan, station commander sa Cebu Coast Guard Station nga wa siya makadawat og reklamo batok sa iyang sakop nga giingong nikatawa og apil sa dihang ang biktima nisumbong sa kapitan nga gitabangan siya og lugos sa upat ka mga tripulante sa nahisgutang barko.
Si Punzalan nipasabot nga girelibohan una sa puwesto si Petty Officer 2 Romeo ug gibalik una sa headquarters sa Cebu Coast Guard sanglit nagpadayon pa ang ilang imbestigasyon niini.
Suma pa niya gusto nilang mahibaw-an kon duna ba kiniy nahimong lapso sa paghawid sa sensitibong sitwasyon diin ang usa ka pasahero sa barko ang giingong gitabangan og lugos sa upat ka mga tripulante.