NEGUSYANTE gipusil patay sa duha ka wa mailhing mga lalake nga nagsakay og motorsiklo dihang padulong na unta sila mosulod sa ilang balay sa miaging gabii sa Bonifacio st., Brgy. Poblacion, dakbayan sa Danao.
Si Jean Bejoc Manto, 33, minyo, nakaangkog samad pinusilan sa walang paa, walang kamot, braso ug tiyan.
Siya gideklarar sa mga doktor nga dead-on-arrival (DOA) sa tambalanan sa Danao city.
Si Chief Insp. Alvin Balio, hepe sa Danao Police nga nahinabi sa Sun.Star Superbalita, niingon nga ang duha ka mga killer nagsakay sa wa matinong motorsiklo nga pulos nagsul-ob og kawo.
Si Jean asawa ni Joseph Manto, usa sa mga tag-iya sa Danao Cable, ingon man sa Manto Memorial Foundation Colleges.
Ang managtiayon gikan dinhi sa dakbayan sa Sugbo uban sa ilang anak nga babaye nga si Joanna.
Apan dihang niabot sila sa ilang balay, ang abana nikanaog sa Pajero nga sakyanan nga tinted ug gituplok ang buzzer sa ilang gate aron ablihan.
Matud pa ni Balio nga dunay sakyanan nga nakasalipod sa lugar hinungdan nga dihang nanaog si Joseph wa gilayon makit-i sa mga killer ug gipusil ang driver’s seat.
Si Jean nga didto sa passenger side mao naigo sa bala sa kalibre .45 nga pistola basi sa tulo ka mga kabhang nga narekober sa kapulisan ingon man usa ka slug sa crime scene.
Giingon nga dunay silencer nga gitaod sa armas nga gigamit sa mga killer tungod kay way buto nga nabati.
Nakit-an pa gyud kini ni Joseph ug nagkatinutukay ang duha apan wa lang siya mailhi hinungdan nga nakahimo siya sa pagdagan.
Gipasabot ni Balio nga tataw kaayong target sa mga suspek ang driver tungod kay kini maoy gitirohan.
Away sa pamilya kalabot sa negusyo ang ilang gitutokan karon, apan wa mohatag og detalye ang kapulisan.