NAILHAN na sa mga sakop sa Panabo City Police Station ang duha ka mga tawong gi-salvage didto sa Barangay Tagpore sa nahisgutang siyudad niadtong Sabado sa buntag.

Sumala pa ni Police Officer 3 Rodney Villacencio nga positibong giila sa ilang mga kabanay ang mga biktima nga mao sila Jonathan Abelgus, hamtung ang panuigon taga Isulan, Sultan Kudarat ug si Cicilia Caraan, hamtung ang panuigon, molupyo sa Marfori Heights, siyudad sa Davao.

Matud ni Villacencio nga mitumaw ang mga kabanay didto sa ilang buhatan aron ilhon ang mga biktima.

Ang duha ka mga biktima walay relasyon ug wala nagkaila segun sa gibutyag sa ilang mga kabanay sukwahi sa unang gitaho nga managtiayon sila.

Ulahing nakit-an matud pa si Caraan didto sa may Boulevard sa siyudad sa Davao sanglit didto siya kanunay magpundo.

Si Caraan nagtrabaho sa usa ka beach resort sa Island Garden City of Samal.

Gidugang ni Villacencio nga brutal ang pagpatay sa mga biktima sanglit gigulgol pa ang liog sa biktimang si Caraan.

Gisusi karon sa kapulisan kung susamang adlaw ba nahanaw ang duha ka mga biktima ug ilhon ang mga suspek nga mihimo sa krimen.

Pasado alas 6:00 sa buntag niadtong Sabado napalgan ang mga biktima nga nagbuy-od daplin sa dalan sa mga empleyado sa Macondry Plastic sa may Barangay Tagpore siyudad sa Panabo. (Marvin Pineda)