"TAMA na, husto na! Dili na makaginhawa ang katawhan".
Kini ang maisugon nga tubag ni Sonny Hinosolango, regional coordinator sa STAREX sa pakighinabi sa Sun.Star Superbalita kagahapon kabahin sa sunod-sunod nga pagtaas sa presyo sa gasolina.
Nisaka na usab og P1.50 ang presyo sa lana niadtong adlawng Martes.
Tungod niini mas ipalanog ingon man awhagon sa Kalipunan ng Damayang Mahihirap kun Kadamay uban ang Solidarity of Transport Alliance in Region 10 (STAREX), Bagong Alyansang Makabayan - Northern Mindanao (Bayan) ug uban pang mga sektor ning dakbayan sa Cagayan de Oro ang ilang panawagan nga "Kalbaryo sa Kabus" karong umaabot nga Semana Santa hangtud Mayo 1, atol sa Labor's Day.
Kini ilang ilusad aron ipaabot ang hugot nila nga kasuko ug pagkadismaya sa walay hunong nga pagtaas sa presyo sa lana, uban sa pagtaas sa presyo sa mga pamaliton ug ubang serbisyong sosyal.
Gani, nagtaas og P1.50 ang Pilipinas Shell Petroleum Corp. ug Chevron Philippines sa ilang diesel ug gasolina niadtong adlawng Martes sa buntag.
Ingon man aduna pay pagtaas sa presyo sa regular na gasolina ug kerosen.
Butyag pa sa Shell nga ang pagtaas subay sa international oil policy.
Apan dili uyon ang Kadamay ug gibutyag ni Francisco Pagayamanan, ang spokesperson nga ispekulasyon ug mugna-mugna lamang kini sa mga kompanya sa lana, ingon man nga kining Big 3 (Caltex, Petron, Shell) nagpasulabi sa ilang pagkahakog ug gusto nga ilang mga tiyan lang ang kanunay busdik.
Dungag pa, gibutyag usab ni Pagayamanan nga dili mohunong ang protesta hangtud dili mahatag ang mga panawagan nga pagbasura sa Oil Deregulation Law, pag tang-tang sa 12% e-Vat sa tanang produkto, dungag suholan sa mga mamumuo ug mga empliyado ug dako nga rollback sa presyo sa lana.
Samtang sa iyang bahin, si Hinosolango niingon nga ang ilang protesta sagol Caravan ug marching rally nga magsugod sa Provincial Capitol, dinhi adunay panagtapok aron ipaabot sa mga kapitolyo ang pagsuporta ug paghimo og resolusyon nga tubag sa ginasagubang nga krisis karon, ilabi na sa pagtaas sa presyo sa lana ug - paingon sa Shell Oil Depo sa Puntod, kini aron ipasibaw ang mulo sa padayon pa nga pagtaas sa presyo sa lana.
Lakbit sab ang mga ahensya sa gobiyerno nga ilang protestahan - Department of Trade and Industry (DTI), Department of Labor and Employment aron isinggit ang P125 dungag suholan; Department of Education aron ipadungog ang panawagan sa pagkondena sa K+12 ug ang angay nga pagdungag pundo sa edukasyon, Commission on Higher Education lakip na usab ang Cogon Market.
Kini nga protesta subay sa Semana Santa diin ang mga ahensya himuon isip mao ang istasyon sa krus. (April Argen Pat B. Marzon/MSU Intern)