ANG atong gituohan mao nga kon di ikapakita ang lawas sa biktima sa murder o homicide, way krimen nga nahimo. Dako kining sayop kay napakyas kini sa paghatag og kalainan sa termino nga corpus ug corpus delicti.
Ang corpus mao ang lawas, the physical substance, sa usa ka tawo, mga tawo, mga balaod ug mga artikulo, sumala pa sa Black’s Law Dictionary. Sa ato pa, kon gipatay si Pedro, ang corpus mao ang patayng lawas ni Pedro.
Sa laing bahin, ang corpus delicti mao ang kinatibuk-an sa mga butang nga nagtudlo nga nahimo ang usa ka krimen (People versus Roluna, 231 SCRA 446). Ning maong kaso, si Roluna gipasakaan og kasong kidnapping ug murder uban sa laing pito pa ka mga akusado.
Nasikop siya, gibista ug gikonbikto sa korte samtang ang iyang pito ka mga kauban at-large, wa pa madakpi.
Niapelar siya sa katarungan nga wa maprobar sa prosecution ang corpus delicti kay wa man makit-i ang lawas sa biktima. Ang kwestyonable ug di maesplikar nga pagkawa sa biktima kinahanglang di ibasol ngadto sa akusado kay dunay posibilidad nga buhi pa ang biktima.
Apan maoy gisaligan sa prosecution ang presumption of death ubos sa Section 5 (x)(3), Rule 131, Rules of Court sa usa ka tawo kansang kinabuhi nahimutang sa kakuyaw ug wa siya igkita sulod sa upat ka tuig.
Sa usa ka kasong murder, naprobahan ang corpus delicti pinaagi sa pagkakaplag sa mga bukog ug buhok sa duha ka mga lalake sa lugar nga gitudlo sa mga akusado sa ilang extra-judicial confession ug sa testimoniya nga ang duha ka mga biktima gigapos ang mga kamot, gibaatan ang mga baba, gidala sa mga akusado sa laing lugar ug human niadto, ang mga biktima wa na igkita. (People versus Garcia, 99 Phil. 381).
Sa laktod, ang corpus delicti mao ang pagpakita nga nahitabo ang usa ka buhat nga maoy sinugdan sa sumbong kriminal, ingon man sa pagpakita sa nagbuhat niini.
Sa ato pa, kon si Pedro gipatay, ang iyang patayng lawas mao ang corpus, samtang ang pagpatay kang Pedro ug nga kini gibuhat sa akusado mao ang corpus delicti.
Laing ehemplo mao ang kasong kawat. Ang corpus mao ang gikawat nga kwarta o bisan unsang butang nga dunay balor, samtang ang corpus delicti mao ang mga elemento sa kasong theft nga mao ang pagkuha sa butang nga gipanag-iya sa laing tawo, nga dunay intensyon nga makaganansya, nga gikuha kini nga way pagtugot sa tag-iya.
(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)
(Sa mga reaksyon kang Atty. Eddie O. Barrita: e-mail: edbarrita@yahoo.com, Cell No. 09165805285 o sa Room 201, 18 Cherry Court Bldg., Gen. Maxilom Ave., Cebu City, 233-4542)