DUHA na ka warrants of arrest ang gihuptan karon sa mga awtoridad aron pagsikop kang Ruben Ecleo Jr., gi-ilang Divine Master sa Philippine Benevolent Missionaries Association (PBMA). Una, mao ang warrant of arrest nga gi-issue sa Sandiganbayan nunot sa iyang kasong graft and corruption. Ikaduha, mao ang gi-issue usab ni RTC Judge Soliver Peras nunot usab sa wala pagtunga sa iyang kasong parricide.
Makadaghan na nga higayon nga napakyas ni Ecleo pagtambong sa hearing sa sala ni Judge Peras kay lagi wanted naman siya. Gikanselar usab ni Peras ang iyang usa ka milyon nga piyansa. Si Ecleo, kinsa kongresista sa Dinagat Island, wala na usab motambong sa sesyon sa Ubos Balay balauranan human siya nagtago-tago.
Niadtong miaging adlaw, gisiksik sa mga tinugyanan sa Criminal Investigation and Detective Group (CIDG 7) ang panimalay ni Ecleo sa may Banawa. Apan bisan anino wala gyud silay nakita. Aw, nahibawo na gud daan ang mga tinugyanan sa balaod nga wala diha si Ecleo apan ila gihapon nga gironda. Pakitang gilas ba aron ingnon nga mangita gyud sila. Asa ka pangita nga hagbay rang nahanaw si Ecleo.
TAGULILONG
Tinuod gyud siguro nga adunay gahum si Ecleo nga dili makita o tagulilong kay wala man gyud siya makit-i sa mga awtoridad human siya nahimong wanted. Ah, naa ra na si Eleco dinhi sa nasod apan wala lang gyud tinud-a sa atong mga tinugyanan sa balaod pagpangita. Gumikan ba kaha sa pulitika. Nahibawo naman kita kon unsa ka gamhanan ang mga Ecleo didto sa Surigao labi pa sa Dinagat Island.
Sila maoy nagkontrolar didto sa pulitika. Ug siguro karon aduna na silay koneksiyon sa administrasyon. Basin misandig na usab kini sila karon sa Aquino administration. Ambot og makadawat ba kaha si PNoy nga makig-alyado sa ingon niining klase sa pulitiko.
Gawas sa pulitika, ang ila usab nga religious influence sa ilang mga sumosunod sa PBMA. Bisan unsay ilang isulti, sundon gayod sa ilang mga sakop. Ang ilang mga sakop andam mopatay ug magpakamatay tungod ug alang kanila.
DAGHANG PATAY
Gumikan sa kagamhanan aning Ecleo ug daghang mga armadong tawo, maglisod ang atong mga awtoridad sa pagsikop kaniya. Sumala og unsay nahitabo niadtong pag-serve sa warrant of arrest batok kaniya nunot sa iyang kasong parricide gumikan sa kamatayon sa iyang asawa nga si Alona Bacolod pipila ka tuig na ang nakalabay. Daghan ang kinabuhi ang nakalas sa iyang mga sakop ug sa mga tinugyanan sa balaod kay misukol man sila didto sa iyang balwarte sa Dinagat Island. Posible nga masubli na usab ang maong hitabo aron lang madakpan si Ecleo. Inutil ang kagamhanan kon dili makadakop aning Ecleo. Mo-ingon lang si Ecleo: “Catch me if you can.”
(bobby@sunstar.com.ph)