MGA sakop sa Theft and Robbery Section (TRS) sa Cebu City Police Office (CCPO) moabag sa mga sakop sa kapulisan sa lalawigan sa Sugbo ngadto sa isla sa Bantayan alang sa pagsaulog sa Semana Santa.

Kini maoy gipahibawo ni Chief Insp. Bonifacio Garciano, hepe sa TRS dihang nahinabi sa Sun.Star Superbalita.

Siya niingon nga nipadangat og komunikasyon kanila sa miaging semana si Sr. Supt. Patrocinio Comendador, director sa kapulisan sa lalawigan sa Sugbo.

Matod pa niya nga upat ka mga personnel sa TRS ang moabag sa Task Force Semana Santa sa CPPO aron susihon kadtong mga kiriwag kamot, sama sa mga tulisan, tirtir, salisi gang ug uban pa.

Ang iyang mga sakop i-deploy gikan sa Abril 18-24 karong buwana.

Gipasabot niya nga sagad sa mga dagkong kalihukan tataw kaayong kadtong mga mangungot mopahimulos sa panahon nga mobiktima sa mga local ug langyaw nga turista nga mosuroy sa Bantayan.

Atol sa maong adlaw, magdala silag mga hulagway ingon man warrant of arrest niadtong mga notadong mangunguot sanglit wa nila isalikway ang posiblidad nga kadtong uban niini gikan sa mga silingang probinsya mobiyahe dinhi sa Sugbo.

Ang iyang personnel ubos sa pag-supervise ni Supt. Teofilo Siclot Jr., deputy for operations sa CPPO kinsa maoy supervisor sa Task Forece Semana Santa.

Dinhi sa dakbayan sa Sugbo pahugtan ang pag-monitor sa mga kiriwag kamot nga posibling mamiktima usab sa mga local nga turista ug langyaw nga mosaksi usab sa mga dagkong kalihukan dinhi sa dakbayan.