NAPALGANG patay nga naglutaw-lutaw sa kadagatan sa Baranga Simala, lungsod sa Sibonga kadtong tawo nga gikatahong missing sulod na sa tulo ka adlaw.
Si Rodrigo Surigao, 38, buwag sa asawa nga taga Tangke, dakbayan sa Talisay, ang gi-claim sa iyang igsuon nga si Matias, kagahapon sa alas 9:00 sa buntag.
Si PO3 Ederlino Bacusmo, imbestigador sa Sibonga Police Station nagkanayon nga si Surigao, wa igkita sugod niadto pang Enero 16, sa hapon human siya naligo diha sa ilang barangay sakay sa banka.
Kagahapong adlawa dihang nakadungog sila sa mga report sa radyo ila gilayong gisusi ang patayng lawas nga napalgan niadtong Martes sa hapon.
Matod pa ni PO3 Bacusmo, nga nagsugod na sa pagkadugta ang patayng lawas sa biktima hinungdan nga pwerti nang pagkabaho-a ug gilubong nila gilayon apan ila una kining gikuhaan og hulagway.
Ang igsoon nibutyag nga naproblema ang biktima sa iyang pamilya gumikan kay nagkabuwag kini sa iyang asawa ug g wa pa gyud kini trabaho.
Hinuon naglisod sila sa pagsuta kon aduna bay foul play sa maong kamatayon ni Surigao kinsa giingon nga way kontra sa ilang lugar.
Wa usab nila isalikway nga nalumos kini samtang naligo.
Duha ka mananagat didto sa Simala, Sibonga maoy nakakaplag sa patayng lawas.