WA nay kinabuhi nga napalgan ang usa ka minero nga nagbuy-od sa usa ka kanal ug nakahiagum og mga samad dinunggaban sa wa mailhing suspek didto sa Purok Langub, Barangay Pamintaran, lungsod sa Maragusan, Comval Province, Miyerkules sa buntag.

Kapulisan nag-ila sa namatay nga si Rommel Bahay, 27, molupyo sa Purok Kamansi, Barangay Mauswagon, lungsod sa Maragusan.

Gibutyag sa kapulisan sa Comval Province Police Provincial Office nga nahitabo ang insidente alas 5:00 sa buntag sa dihang napalgan si Bahay nga wa nay kinabuhi ug nagbuy-od sa kanal sa nahisgutang lugar.

Sa dihang gihiling ang lawas, nasuta nga dunay daghang samad dinunggaban si Bahay nga maoy gituohang hinungdan sa iyang kamatayon.

Mga trabahante sa Gold Mock Ore nakadiskubre sa patay'ng lawas sa biktima didto sa maong lugar.

Kapulisan mihimo na karon og pakisusi aron nga ilhon ang mga mamumuno ug ang motibo kon nganong gipatay ang biktima.

Patay'ng lawas sa biktima gihiluna na sulod sa usa ka punerarya sa lungsod sa Maragusan.