NAKABSAN sa kinabuhi ang tinun-an sa 3rd Year high School human gituohang nalumos sa suba sa Barangay Bayanga, ning siyudad sa Cagayan de Oro.
Giila ang biktima nga mao si Lalaine Tolilis, 14, residente sa susamang dapit.
Si Police Officer 3 (PO3) Rosita Pascua sa Police Station 8 (PS8) sa Lumbia niingon nga nahitabo kini niadtong nilabayng’ adlaw diin ang biktima kuyog ang iyang mga classmate sa high school nangaligo sa suba.
Giingong mag-shoot unta ang maong mga tinun-an og video alang sa requirement sa ilang usa ka subject apan naaghat ang mga biktima nga mangaligo sa suba tungod daw sa kapatsada niini.
Gibutyag sa usa ka tinun-an nga naglilo ang tubig ug giingong morag gisuyop ang biktima paingon sa ilawom.
Daw gikabutyag nga dili makabalo molangoy si Tolilis ug gituohang nakraman kini hinungdan kalit kining miunlod sa ilawom nga maoy hinungdan sa iyang pagkalumos.
Ang iyang mga kauban nakalingkawas apan dihang nakita ang biktima wala na kini kinabuhi.
Ang patayng’ lawas sa biktima gidala na sa puloy-anan niining panahona. (SVB)