DEAD on arrival ang usa ka lalaki human nakaplagan nga nagbuy-od daplin sa dalan kagahapon mga alas 2:00 sa kadlawon sa dalan Hayes-Daumar St., ning siyudad sa Cagayan de Oro.

Wala maila ang pangalan sa biktima tungod kay walay nakita nga identification card ang mga polis gikan sa Police Station 2 (PS2) sa Cogon nga niresponde sa hitabo.

Gibana-bana na lamang nga nag-edad kini og 30 pataas, adunay katas-on nga 5'7 ug nagkarsones ug kolor blue nga tsinelas.

Adunay nakakita niini hinungdan nga gitawagan ang PS2 ug gidala ang biktima sa Northern Mindanao Medical Center (NMMC) tungod kay kalit lang kining naligid apan paghidangat sa balay tambalanan gideklarar kining dead on arrival sa mga doktor.

Si Police Officer 3 Jhonny Agutaya sa PS2 nga nahinabi sa Sun.Star Superbalita niingon nga nagbula-bula ang baba sa biktima ug duha ra ang rason nganong magbula ang baba sa usa ka tawo.

Una niini, gituohang gipatol o giatake kini sa iyang sakit ug ikaduha posibleng miinom kini og hilo.

Apan ang tanan niini padayon pang gisuta labina wala paman ang hingtungdan sa biktima ug makasulti kung unsay gibati niini.

Sa pagsulat ning balita, nanawagan na lamang ang mga polis sa mga nawad-an og sakop sa pamilya nga susihon ang patayng lawas nga anaa pa sa morgue. (Stephanie V. Berganio)