NADUGTA na ang lawas sa usa ka amahan dihang nakaplgan sa kakahoyan niadtong Miyerkules mga alas 6:30 sa gabii sa Sampatulog, lungsod sa Alubijid, Misamis Oriental.

Girepondehan sa Alubijid Police Station ang biktima nga mao si Domingo Abriol Sr., 61, minyo, kinsa naghikot og pisi sa iyang liog ug nagbitay na sa punoan sa kahoy.

Sa interbyu nga gihimo sa Sun.Star Superbalita ngadto kang Police Chief Inspector Virgilio Cabugsa, hepe sa Alubijid Police Station niingon nga problemado kaayo ang biktima unsaon paglukat sa yuta nga giprenda niini.

Nasayran sa mga polis nga ang maong yuta gipanag-iyahan sa igsuon niini apan naprenda og dako hinungdan nga maglisod na kini sa paglukat.

Gani, tungod sa kabalaka niini unsay ilukat magsige kini og bahad nga maghikog na lamang.

Apan niadtong Sabado uwahing nakita ang biktima ug nagsige usab kini og ingon sa iyang anak nga "baho nako nga makita ninyo" apan wala lamang gitagad sa anak sa pagtuong nagbinuang lamang kini.

Dihang wala makauli ang amahan ila kining gipa-police blotter gani gideklarar kining missing sa mga polis ingon man labihan ang pagpangita nga gihimo sa pamilya niini.

Niadtong Miyerkules, nakita ang biktima nga nadugta na ang lawas apan nagbitay gihapon sa punoan sa kahoy ug naghikot og pisi sa iyang liog.

Ang kapolisan niklaro ug apil ang pamilya kumbinsido nga walay foulplay sa kamatayon sa bitima kinsa gidala karon sa Agrida funeral Homes sa maong lungsod. (Stephanie V. Berganio)