SA ikaduhang higayon, gitangtang sa katungdanan sa Ombudsman si Dumanjug Mayor Efren Guntrano “Gungun” Gica gumikan sa giingong anomaloso nga mga dokumento kabahin sa pag-liquidate sa iyang nagasto sa pagpakaon sa mga barangay kapitan atol sa usa ka seminar nga gipahigayon sa Cebu City tulo ka tuig na ang nakalabay.
Ang basihanana sa maong kaso mao ang resibo nga gipresentar ni Gica sa iyang liquidation nga diin nakatatak sa orihinal nga resibo ang kantidad nga P11,435 gikan sa Ding Qua Qua restaurant sa may JY Square, Lahug apan matod pa gipaburot kini ni Gica ngadto sa P21.435 aron siya makabenispisyo personal.
Unang gitangtang si Gica niadtong buwan sa Marso apan gipabalik kini sa katungdanan sa Ombudsman human hatagi siya og konsiderasyon gumikan kay wala siya kahatagi ug kahigayonan sa pag-presentar sa iyang mga ebidensiya. Ang kaso gipasaka ni kanhi mayor Nelson Garcia nga maoy higpit nga kaatbang si Gica sa pagkamayor sa maong lungsod. Bise mayor pa si Gica sa dihang nakomiter ang kuwestiyonableng transaksiyon.
Kasong administratiba nga dishonesty ug grave misconduct ang gi-atubang ni Gica ug malversation of public funds, three counts of falsification of public documents ug kalapasan sa Anti-Graft and Corrupt Practices ang kasong kriminal nga paga-atubangon ni Gica. Hinoon, dili pa kini final ang maong desisyon kay ang maong Ombudsman decision pwede pa man i-apelar sa Court of Appeals o ngadto sa Korte Suprema.
Laban o bawi man ning desisyon sa Ombudsman. Pero nakita siguro sa mga imbestigador nga adunay igong ebidensiya ug sukaranan ang anti-graft office nga ilambigit si Gica sa maong mga kaso. Nagkanayon si Gica nga pulitika lang ang hinungdan niini kay si Garcia man ang nagpasaka sa kaso. Aw, ingon ana gyud na kay kining iyang mga kaatbang dili man mahunong sa pagpangita og sayop aron makabawos. Ana man nang pulitika. Busa ayaw ninyo hatagi og kahigayonan nga makakita og rason ang inyong mga kaatbang nga makiha mo.