UBOS sa administrasyon ni Mayor Mike Rama, dako na kaayo og kausaban ang relasyon tali sa Siyudad ug Kapitolyo.

Di pa lang dugay mitaak, sa labing unang higayon sukad miaslom ang relasyon sa Siyudad ug Kapitolyo, si Gobernador Gwen Garcia sa City Hall.

Niadtong Martes usab, gibuksan ni Garcia ang dalan sa Larsian nga iyang gipasirhan dihang gipakita sa Kapitolyo kinsa ang tag-iya sa luna sa Fuente Osmeña.

Bugti sa pagbukas mao ang pag-uli sab sa City Hall sa trailer nga gisakmit sa Citom samtang kini gibabag aron way makaagi sa mao nga karsada.

Dihang namunoan pa si Kong. Tomas Osmeña, imposible kaayong mangahitabo kining mao nga mga kalambuan.

Karon lang bag-o nagpakita og timailhan ang Siyudad nga motugot na nga mapadayon ang Ciudad project sa Kapitolyo nga napakgang sab sa panahon ni Osmeña sa katarungan nga grabe ang kahimtang sa trapiko sa Banilad Talamban road.

Kaniadto kaalyado pa sila si Rama ug Osmeña, apan base sa nangaging mga kalambuan, di na magkaabot ang dalan sa duha kay nabuak na.

Grabe nang nakapanaway si Osmeña kang Rama samtang ang mayor mibuhat sa mga butang nga wa gyud mauyoni sa kanhi mayor.

Kaniadto ang kontra ni Osmeña mao lang ang gobernador, apan karon sila nang duha ni Rama.

Maayo nga tilimad-on alang sa kalambuan ang gibuhat sa duha ka mga dagkong lider sa Sugbo.

Apan sa samang higayon, ang gibuhat nila ni Rama ug Garcia matawag sab nga palagot sa kontra.