GITUN-AN sa kadagkuan sa Task Force Ellah Joy ang posibling pagpasaka og kaso batok kang Kapitan Narciso “Boy” Tablate sa Brgy. Inayagan, dakbayan sa Naga.

Kini maoy gibutyag ni Sr. Supt. Parocinio Comendador, director sa kapulisan sa lalawigan sa Sugbo ug tigpamaba sa Task Force Ellah.

Ilang nabantayan nga sukad sa ilang pagsugod sa pagpahigayog ronda sa balay ni Bella Ruby Santos, si Tablate dugay nikooperar sa Criminal Investigation and Detection (CIDG-7) ug task force.

Dihang ilang ipatuman na ang search warrant batok kang Santos, si Tablate nagsigi og pangutana, nagkute-kute sa raiding team kon si Santos ba ang target sa CIDG-7 apan wa gyud nila sultihi hinungdan nga nagtuo silang nasuko ang kapitan.

Wa nila isalikway nga posibling naka-benipisyo ang kapitan kang Santos.

Hinuon di lang siya makasulti kon unsa kini apan ang mga lakang niini tataw kaayo nga nasuko sa mga pulis.

Iyang gipasabot nga isip usa ka opisyal angay untang mokooperar siya sa kapulisan labi na nga ang iyang barangay dunay mga report labot sa cyber sex.

Tungod niini, dako ang ilang pagtuo nga nasuko ang kapitan kanila tungod kay wa sila mo-coordinate niini ingon man motug-an sa ilang target sa operasyon.

Gipasabot niya nga ang task force nag-amping usab sa ilang operation.

Gani pipila lang ka mga sakop niini ang nakahibawo sa target sa pagparonda aron malikayan nga di mahibaw-an kon kinsa gyoy ilang target.

Tan-awon usab nila ang posibling pagpasakag tukmang kaso niini sa Department of Interior and Local Government (DILG-7) human unya sa ilang imbestigasyong pagahimuon.