KAPIN sa P30,000 nga cash ug butang nasakiyo sa duha ka armadong mga tulisan nga nagsakay sa motorsiklo nga nitulis sa salesman sa softdrinks samtang padulong mokaon sa karinderya mga alas 3:00 kagahapon sa hapon sa Sityo Baka, Barangay Apas, dakbayan sa Sugbo.

Si Jaos Demetrio, 33, minyo, salesman sa Pepsi Cola Corp., taga Sitio Allied, Barangay Tipolo, dakbayan sa Mandaue, nakuhaan sa gibana-banang P25,000 nga cash nga halin sa softdrinks, P2,850 nga personal nga cash ug cellphone nga nibalor og P5,000.

Ang mga suspek pulos nagsul-ob og itom nga jacket, nga nag-bonnet nga nagsakay sa usa ka motorsiklo nga kolor blue, way plate number samtang nagdala og armas nga .38 revolver ug kalibre .45 nga pistola.

Si PO2 Jovito Labra, imbestigador sa Theft and Robbery Section (TRS) sa Cebu City Police Office (CCPO) nga nahinabi sa Sun.Star Superbalita, niingon nga si Demetrio padulong nang mokaon sulod sa Ding Eatery nga ilang gihatdan sa soft drinks.

Samtang naglingkod siya padulong mokaon samtang ang iyang helper truck boy na busy sa pag-arrange sa mga botelya sa softdrinks nga gisakay sa iyang truck, iyang nabantayan ang usa ka suspek nga naglakaw sa iyang likod nga kalit lang nition sa iyang gidalang .38 caliber revolver dayon nideklarar og tulis dayon nisulti nga “ambi na ang imong kwarta.”

Tungod sa kakuyaw sa biktima, wa siyay nahimo. Iyang nabantayan nga niabot ang kolor blue nga motorsiklo diin nanaog usab ang driver nga nagdalag kalibre .45 nga maoy nagti-on sa iyang ulo.

Ang unang suspek maoy nagkapkap niya nga nanguha sa iyang kwarta nga halin ug kaugalingong kwarta lakip na ang iyang cellphone samtang ang armas gibutang sa lamisa.

Way namay-ongan ang biktima sa duha ka mga tulisan sanglit wa siya patan-awa niini dihang giti-unag armas.

Ang nakita lang nga ang duha nagsul-ob sa itom nga jacket, nag-bonnet ug nagsakay sa kolor blue nga motorsiklo.

Human sa pagpanulis ang duha ka mga tawo daling ningsibat ug wa na mabantayi sa biktima ingon man sa mga tawo sa lugar kon asa kini nipadulong sa ilang pag-agi.

Nagtuo sila nga mga local boy ang duha ka mga tulisan.

Hinuon nihimo sila karon og dugang follow-up sa sanglit ikaduha nang higayon nga ang salesman sa Pepsi nabiktima sa tulis.

Matod pa ni Labra nga wa nila isalikway ang posibilidad nga dunay mga kanhi trabahante, o kaha inside job ang insidente sa pagpanulis hinungdan nga mohimo pa silag lawom nga imbestigasyon.

Gawas niini mohimo usab sila og background check sa salesman o kaha mga kanhi impliyado sa Pepsi nga posibling maoy nagplano sa pagpanulis.