GIDAGIT ang duha ka sundalo sa mga miyembero sa New People's Army (NPA) alas 2:00 sa hapon niadtong Huwebes didto sa probinsya sa Cotabato.

Nagsulti si Colonel Prudencio Asto, hepe sa Public Affairs Office sa 6th Infantry Division sa Philippine Army, nga sakay sa usa ka motorsiklo ang mga sundalo didto sa President Roxas sa utlanan sa munisipyo sa Antipas, apan giatngan sila sa mga armadong kalalakin-an ug gipugos sa pagdala sa bukiron nga bahin sa nahisgutang lugar.

Sumala sa mga nakakita, wala'y nahimo ang mga biktima gumikan kay daghan kaayo ang mga rebelde unya armado pa sa mga tag-as nga matang sa armas.

Pulos mga sakop sa 57th Infantry Battalion sa Philippine Army ang mga gidagit nga sundalo.

Dako ang pagtuo ni Asto nga grupo ni Kumander Punyong sa Front Committee 53 sa NPA ang midagit sa duha ka sundalo.

Nagdumili sab ang manunian sa 6th ID sa pagbutyag sa bansagon sa mga biktima gumikan wala pa mapahibawo ang ilang matag pamilya.

Gimando na ni 6th ID Chief Major General Anthony Alcantara ang rescue operation sa mga gidagit ug lutoson ang mga rebelde.