GILANTUGIAN sa mga miyembro sa 4th Sangguniang Panglungsod (SP) sa siyudad sa Digos ang giduso nga ordinansa bahin sa pagpahimutang sa mga night clubs ug uban pang balay kalingawan nga layo sa simbahan ug tunghaan sa dakbayan.
Sa gihimong sesyon niadtong Huwebes sa hapon, usa ka ordinansa ang giduso ni Konsehal Milagros Llanos "regulating the distance of nightclubs and brothels from churches, mosques, government institutions and schools in this city."
Buot ni Llanos nga di mahimong law-ay nga tan-awon nga naa nahimutang ang mga balay kalingawan duol sa simbahan, tunghaan ug mga buhatan sa kagamhanan.
Apan sumala ni Konsehal Lanie Gabutero nga malisdan sila sa paghimo niini gilayon tungod kay gikinahanglan pa ang parobadong zoning ordinance sa dakbayan. Sa maong ordinansa, gisugyot nga ipahimutang ang mga balay kalingawan mga 200 metros ang gilay0on sa mga simbahan, tunghaan ug buhatan sa kagamhanan.
Nasayran sa Sun.Star SuperBalita nga adunay mga gibuksan nga mga night clubs sa siyudad nga dunay kababainhan nga mosayaw nga hubo nga duol ra sa Simbahang Katoliko.
Apan matud ni Gabutero nga malisdan sila sa pagpahawa sa mga bay kalingawan sa ilang nahimutangan karon tungod kay legal na ang ilang establisemento sanglit kompleto sila sa business permit gikan sa licensing division sa dakbayan.
"Naa na man na sila diha daan unya naa pod na sila'y mga lisensya so atoa pa ning tun-an," tin-aw ni Gabutero.
Gumikan kay nahimong dakong hisgutanan ang sugyot nga ordinansa gitakdang mohomo of committee meeting ang mga konsehal aron hisgutan kon unsay angay nilang himuon.
Apilon paghisgot sa mga konsehal ang gikatahong prostitution den nga nag-operate sa dakbayan.