BISAN pa man kon sakop sa probinsya, gilantaw sa komitiba sa edukasyon sa konseho ning siyudad Cagayan de Oro nga makaayuda ug makatabang sa pagbarog sa pipila ka bahin sa Misamis Oriental General Comprehensive High School ning siyudad nga nasunog niadtong Martes sa hapon.

Si Konsehal Adrian Barba, chairman komite sa Edukasyon sa konseho, nibutyag sa usa ka interbyu sa radio nga 90 porsiyento sa mga tinun-an ang nagikan sa siyudad sa Cagayan de Oro ug angayan lamang kining mahatagan ug ayuda.

Bisan paman parte kini sa probinsya ang tumong sa komitiba sa edukasyon mao ang paghatag og saktong edukasyon sa tanan mga tinun-an, nagumikan man kini sa probinsya ug siyudad.

Gikatakdang ipasa ni Barba ang resolusyon ngadto kang Mayor Vicente Emano aron maaprobahan ug maayudahan ang MOGCHS.

Kini labina magsige og panawagan si Principal Pedro Montejo nga naghangyo makaabag pagbarog kanila.

Hinuon, dili man madali nga magbarog kini pagbalik apan gipanawagan ug gipahibalo ni Barba nga karong bulan sa Hunyo ug tingbukas sa klase pormal na nga buksan ang Kauswagan National High School diha sa Barangay Kauswagan ug girekomendar ang mga tinun-an labina ang first year sa pag-enroll sa maong tunghaan.

Gikatakda usab nga buksan ang tunghaan sa hayskol sa Bonbon ning siyudad.

Sa iyang bahin usab ni Kagawad Jimmy Caina kinsa komite usab sa Edukasyon sa Sangguniang Panlalalawigan, miingon nga karong umaabot nga Lunes unang tagaan nila og pagtagad ang paghisgot kalabot sa tabang nga ipaabot alang sa tunghaan sa MOGCHS. (Stephanie V. Berganio)