WALA na’y moatras kay pirmado na ang kontrata.
Ning bag-uhay lang, gipirmahan na nila ni Rey “Boom-Boom” Bautista ug Mexican Heriberto Ruiz ang kontrata sa ilang gikaintapang panagharong og balik.
Ang away maoy main event sa “Pinoy Pride 6: Grudge Rematch” nga gikatakda karong Hunyo 11 dinhi sa Sugbo.
Sa premirong away, gitumba ni Ruiz si Bautista aron pagkulit og agianan paingon sa unanimous decision nga kadaugan.
Si Ruiz maoy ikaduhang nakapilde kang Bautista sunod ni Mexican Juan Ponce de Leon (KO 1).
Sa Pinoy Pride 5 nga gipahigayon sa Bacolod City, si Bautista nipadayag sa national media kon unsa ka dako ang iyang tinguha nga makabawos sa maong kapildihan.
Gipasabot ni Bautista nga adunay gamayng liki ang bukog sa ihang walang pulso niadtong higayuna hinungdan nga wala kaayo kini niya nagamit.
Hinuon gitataw ni Bautista nga kini niya gihimong rason sa iyang kapildihan.
Karon nga naoperahan na ang angol ug hingpit na kining naalim, nagpanikad na gyud si Bautista.
Matod sa Boholano nga sige gyud siya’g hunahuna sa maong kapildihan ug dugay na sab gyud niyang gihuwat ang adlaw nga magkaharong sila pagbalik ni Ruiz.
Ang Pinoy Pride gipasiugdahan sa ALA Promotions ug ABS-CBN inabagan sa Waterfront Cebu City Hotel and Casino, Diamond Suites and Residences, Thirsty Juices and Shakes, Mooon Café, SM City Cebu ug Parkmall.