DAGHAN pang mga utang ang Cebu City Hall nga hangtod karon wa pa gihapon mabayri.
Pananglitan, ang P2.6 million nga packed meals sa Karl’s Catering Services, P1.26 million nga uniform alang sa mga atleta sa Central Visayas Athletic Association (Cvraa), ang P4.2 million nga pagkaon nga gi-serve ngadto sa mga maestra atol piniliay niadtong Mayo 2010 ug ingon man ang utang niini ngadto sa mga media.
Kini maoy pipila lang nga atong nahisgutan.
Sukwaot kaayo paminawon alang sa usa ka inila ug dakong dakbayan sa Rehiyon 7 nga nalukop diay sa mga utang nga ultimo mga pagkaon di dayon mabayran.
Tingali’g moabot ang higayon nga di na suklan sa mga tigpatigayon ang Cebu City Hall tungod kay gahi kaayo kining mobayad.
Kon ang ubang local government unit dali rang makabayad sa ilang gipang-utangan, way rason nganong di kini mahimo sa Cebu City Hall.
Dunay mga pangagpas nga sagad sa kasamtangang mayor di interesado nga mobayad sa utang nga gihimo sa miaging mayor. Mahimong mahulagway nga kini pamulitika.
Duna usay posibilidad nga ang ka istrikto sa Commission on Audit (COA) sa pagpasubay sa proseso maoy hinungdan.
Apan ang labing duol nga rason nga posibling gilingkuran lang ang mga papeles o dokumento sa pipila ka mga staff sa departamentong maoy mo-release sa bayad kay tingali og naghuwat nga tanyagan og padangog sa mga naningil niini.
Laing matang sa negusyo.