MOKABAT sa P300,000 ang danyos sa sunog nga niigo sa usa ka balay mga alas 6:45 sa buntag kagahapon sa Barangay Kabitoonan, dakbayan sa Toledo.
Apan atol sa pag-ulbo sa kayo, usa ka sakop sa kapulisan sa dakbayan sa Toledo naangol sa paa kay naigo sa bildo.
Lakip sa naangol ang tag-iya sa balay.
Si Senior Insp. Randy Mendaros, fire marshall sa dakbayan sa Toledo, niingon nga ang sunog nagsugod sa ikaduhang andana sa balay ni Porperio Dolino, 75, nga ginama sa kahoy ug kongkreto.
Gibutyag niini nga napa-ubos sa second alarm ang sunog diin upat ka mga fire truck ang na dispatch sa lugar nga gilangkuban sa mga bombero sa lungsod sa Pinamungajan ug Balamban.
Hinuon ang sunog nakontrolar pag-abot sa usa ka oras diin ang kayo nagagikan sa ikaduhang andana nga gitouhang electrical misuse.
Si Dolino nakaangkog first-degree burns sa walang kamot samtang usa ka sakop sa Toledo police nga si SPO1 Emmanuel Elijay nakaangkog samad sa walang paa human nitabang sa bombero apan naigo sa buak nga bildo.