2 ka `tulisan’ mieskapo, nasikop

NING-ESKAPO ang duha ka dinakpang mga gikatahapang tulisan pinaagi sa pag-ambak sa patrol car sa Naga Police Station dihang dad-on unta sila sa Provincial Prosecutor’s Office aron pagkuha sa commitment order kagahapon sa udto diha sa Brgy. Poblacion, lungsod sa Minglanilla.

Hinuon nadakpan ra sab sila sa pagbalik.

Si Eric Avello, 23, ulitawo, ingon man Si Alex Cayumo, 39, buwag sa asawa, pulos mga lumolupyo sa Seaside Barangay North Poblacion sa dakbayan sa Naga, nadakpan hinuon human sa ginukdanay sa kapulisan ingon man sa mga sibilyan.

Si PO3 Francisco Codeñera sa Naga police kinsa nag-escort sa duha ka mga tulisan nga nahinabi sa Sun.Star Superbalita, niingon nga uban niya ang civilian driver padulong sa Kapitolyo sakay sila si Avello ug Cayumo.

Apan sa ilang pag-abot sa may Poblacion sa Minglanilla, hinay ang dagan sa patrol jeep tungod kay traffic kalit lang niambak ang duha ug nikaratel sa pagdagan hinungdan nga dali usab nilang gigukod.

Pag-abot sa pipila ka metros ang duha nagkabuwag sa pagdagan tungod kay natangtang ang pusas sa ilang mga kamot, hinungdan nga si PO3 Codeñera, napugos sa pagpabuto makaduha ka higayon sa iyang 9mm pistol isip warning.

Apan si Capuyo mipadayon sa pagdagan, hinungdan nga sa ikatulong higayon iyang gipusil apan gi-swerte ang tulisan sanglit wa maigo tungod kay nakahupo.

Dunay mga habal-habal driver sa lugar ang iyang gisinggitan nga babagan tungod kay eskapo hinungdan nga nadakpan si Cayupo ug gitabangan sa pagkulata sa mga residente sa lugar.

Samtang si Avello didto na madakpi sa Barangay Bagay pipila ka minutos human sa ginukdanay nga pwerte usab nga bun-uga tungod kay gikulata sa mga tawo nga nitabang sa paggukod kaniya.

Andam hinuon niyang tubagon ang imbestigasyon kon siya ipatawag sa ilang labaw.

Giingong Si Avello, nakakuhag alambre nga maoy gigamit niini sa pagtuslok sa pusas nga dunay deperensya hinungdan nga naabli.

Hinuon mga alas 50 pasado sa hapon nabalhog gyud ang duha sa Bureau of Jail Management and Penology (BJMP) jail human nakuha nila ni PO1 Michael Villiarmia ug PO2 Cristino Canono ang commitment order.

Si Sr. Insp. Rolando Yballe hepe sa Naga Police nitug-an sa Sun. Star Superbalita nga dunay gamay nga lapses si PO3 Codeñera hinungdan paesplikahon human gipahibalo niya si Sr. Supt. Patrocinio Comendador, director sa kapulisan sa lalawigan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph