MITUNOL og tabang pinansiyal ang lokal nga kagamhanan sa lungsod sa Sta. Cruz, Davao del Sur sa pagpanguna ni Mayor Joel Ray Lopez ngadto sa mga sundalo nga biktima sa pagbusikad og landmine sa mga rebeldeng New People's Army niadtong Marso 23.
Sila si Sargeant Rannie H. Fuentes ug Corporal Lajabassal A. Patta ug usa ka dependent, ug asawa ni anhing Private First Class Charlie P Centina mao ang nakadawat sa hinabang pinansiyal nga wa gikabutyag ang kantidad.
Si Fuentes ug Patta gitunolan sa hinabang didto sa Camp Panacan Hospital, siyudad sa Davao niadtong Abril 13.
Laing tabang pinansiyal ang gitunol ni Davao del Sur first district Congressman Marc Douglas Cagas ngadto ni Lieutenant Col. Oliver R Artuz, commander sa 39th Infantry Battalion aron ihatag sa mga samarong sundalo.
Si Mayor Lopez kinsa nahinabi sa Sun.Star Superbalita nagsulti nga padayong mosuporta ang lokal nga kagamhanan sa pakigbisog sa kasundaluhan batok sa mga komunistang NPA nga nagtago-tago sa kabukiran sa ilang dapit.
"Kini bisan ginagmay nato nga amount apan kinasingkasing ni nga gihatag sa atong lokal nga panggamhanan pagpakita ug pagpasalamat pod kanila, show of gratitude, show of thanks to them for their support sa atoang local government, sa atoang peace efforts, sa tanan-tanan nga suporta sa 39IB, Philippine Army and of course sa atoang demokrasya," ni Lopez.
Kahinumduman nga tulo ka sundalo ang namatay nga sakop sa Peace and Development Teams 3 sa militar human gipabuthan og landmine sa mga rebelde samtang milusad sa outreach program didto sa Barangay Sibulan, Sta. Cruz, Davao del Sur.
Gisulti ni Artuz nga padayon nilang gihimo ang maong programa sa mga barangay bisan sa hulga sa mga rebelde.
"Bisan padayon ang mga NPA sa pagpanghasi ug pagpanghadlok sa atong kabarangayan, makalaum ang katawhan nga padayon ang peace and development efforts sa 39IB ug sa tibuok kasundaluhan dinha sa Davao del Sur aron atong makab-ot ang tinuod nga kalinaw ug kalambuan sa atong tagsa-tagsa ka komunidad," sigon ni Artuz.
Gibati og dakong kalipay si Artuz sa dihang gisaad ni Lopez nga suportahan sa iyang administrasyon ang Bayanihan ug Peace and Development nga gipasiugdahan sa 39th IB. (Orlando B. Dinoy)