PIPILA ka lugar sa Davao Region ang duawon sa mga personahe sa Department of Social Welfare and Development (DSWD) aron ipasabot ang unod ug kun unsa ang katikaran sa programang Kapit-Bisig Laban sa Kahirapan-Comprehensive and Integrated Delivery of Social Service: Kapangyarihan at Kaunlaran sa Barangay (KALAHI-CIDSS: KKB).
Pahayag ni Carmela Duron, regional information officer sa DSWD nga karong bulan sa Abril pipila ka lugar ang adtuon sa mga personahe sa ahensiya aron ipasabot kanila ang dagan sa programa, unsaon kini, pamaagi, lakip na proseso.
Sa gipaabot nga mensahe ni Druon, nasayran nga karong Abril 18 ning tuig, himuon ang Municipal Advisory Committee Meeting sa Manay, Davao Oriental.
Uban sa tigum mao ang paghisgut sa mga isyu, pagtuki sa pipila ka hisgutanan labot sa programa nga ipatuman sa lugar.
Pagka-Abril 19-20, himuon na sab ang laing orientation sa mga barangay kapitan, principal, midwives ug day care workers sa Sulop Davao del Sur.
Sila pasabton sa programang Kalahi-CIDSS lakip na ang tulo ka sistema niini.
Abril 20 sab, magkatapok sab ang pipila ka indibidwal alang sa Municipal Advisory Committee (MAC) meeting sa Compostela Valley Province.
Sumala pa nga pagahisgutan gihapon ang mga proyekto nga ipatuman sa pipila ka bahin sa probinsiya, mga isyung giatubang, pakigtie-up sa pipila ka partners.
Sa pikas bahin, ang pagpasabot sab sa mga barangay kapitan, school principal, midwives ug daycare workers may kalabutan sa KALAHID-CIDSS program ang tumong sa grupo sa ilang pagduaw sa Boston ug Lupon Davao Oriental, Abril 25-26, ug sa Cateel ug Baganga sa samang probinsiya, karong Abril 27-28, ning kasamtangang tuig.
Samtang karong Abril 26, himuon na sab ang Regional Advisory Committee Meeting diha sa DSWD Seminar Hall ning siyudad diin hisgutan ang mga isyu, suliran nga nagpalibot sa pagpatuman sa programa, lakip na ang paglantaw sa kun unsa kini ka-epektibo, nahatag nga kaayuhan ngadto sa napiling beneficiary. (Rhona O. Goc-ong)