NANGAANGOL ang duha ka mga tawo human gipamusil sa wala mailhing mga suspek didto sa Barangay Bongabong, lungsod sa Pantukan, Comval Province, Huwebes sa gabii.
Mga biktima giila sa kapulisan nga sila si Christopher Villacampo, 38, ug si Aida Abad, 45, pulos molupyo sa Sityo Sangi, Barangay Bongabong, lungsod sa Pantukan.
Sa imbestigasyon sa Comval Province Police Provincial Office, nasayran nga pasado alas 9:00 sa gabii nahitabo ang insidente sa dihang sila Villacampo ug Abad tua sa balay sa naulahi.
Kalit matud pang mibutho ang wala mailhing suspek nga nakamotor ug sa way dugang pangutana gipamusil ang mga biktima makadaghang higayon gamit ang wala matino nga kalibre sa armas.
Naigo si Villamcampo sa batiis ug sa lawas samtang si Abad naigo sa abaga ug batiis.
Ang duha ka mga biktima pulos gipangdala sa Davao Regional Hospital sa siyudad sa Tagum.
Sa pikas bahin, usa ka lalaki ang gisikop sa mga otoridad human nasakpang naghupot og marijuana didto sa lungsod sa Sto. Tomas Davao del Norte, Biyernes sa udto.
Nailhan ang dinakpan nga mao si Rodel Reponte, 28, molupyo sa Feeder Road 3, Barangay Tibal-og, lungsod sa Sto. Tomas.
Matud pa sa kapulisan sa Davao del Norte Police Provincial Office nga pasado alas 12:00 sa udto nasikop sa mga nagpatrolyang sakop sa kapulisan si Reponte human nadawat ang sumbong labot sa paghupot sa suspek og ginadiling druga.
Nasakmit sa mga otoridad gikan sa dinakpan ang kapin 41 gramos nga gituohang pinaugang dahon sa marijuana nga giputos sa mantalaan ug gitaguan sa iyang panty.
Misuway pa unta og ikyas ang suspek apan nasikop gihapon sa mga otoridad.
Gidala ngadto sa presinto sa kapulisan ang suspek aron maimbestigahan.
Kasong paglapas sa Republic Act 9165 kun Comprehensive Dangerous Drugs Act ang gihikay na sa kapulisan batok sa suspek. (Marvin Pineda)